DALAWANG miyembro ng Philippine Air Force (PAF) ang nasugatan matapos bumagsak ang sinasakyan nilang eroplano sa Mt. Sto. Tomas sa Sitio Cabuyao, Barangay Poblacion, Tuba, Benguet nitong Miyerkules ng umaga.

Ayon sa pulisya, nangyari ang insidente bandang alas-10:20 ng umaga ngunit naiparating lamang ito sa mga awtoridad dakong alas-11:40 ng umaga.

Ayon kay Lt. Col. Roy Calulot, tagapagsalita ng Benguet Police Provincial Office, ang bumagsak na eroplano ng PAF ay may tail number na 10-39.

Isa sa mga nasugatan ay nakilalang si First Lieutenant Ruth Angelique R. Pasos.

Hindi pa inilalabas ng mga awtoridad ang pagkakakilanlan ng isa pang lalaking airman na kasama niya sa eroplano.

Kabilang sa mga rumisponde sa crash site ang mga tauhan ng Bureau of Fire Protection, at Municipal Disaster Risk Reduction and Management Office.

Unang natagpuan ang mga biktima na walang malay at agad na dinala sa pinakamalapit na pagamutan.