MULING bubuksan ng Kapulungan ng mga Kinatawan ang plenaryong sesyon na may hindi bababa sa dalawang panukalang batas na nakahanda na para sa pinal na pag-apruba, bilang pagpapatuloy ng legislative momentum nito sa Ikalawang Regular na Sesyon sa pamamagitan ng mga panukalang reporma sa mga kooperatiba at pagtatatag ng isang Pambansang Araw ng Pasasalamat.

Ang pagtutulak sa mga panukalang ito ay kasunod ng Unang Regular na Sesyon, kung saan nakapagpasa ang Kamara ng mahigit 160 panukalang batas sa Senado at naaprubahan ang 26 sa 52 prayoridad na panukalang inendorso ng Legislative-Executive Development Advisory Council (LEDAC).

Ayon kay House Majority Leader Ferdinand Alexander “Sandro” Marcos, ang mga panukalang naghihintay ng pinal na aksyon ay patunay na nanatiling tuluy-tuloy ang gawaing lehislatibo ng Kamara kahit sa panahon ng recess at handa itong bumalik upang magsagawa ng botohan.

“Naglatag si Pangulong Ferdinand ‘Bongbong’ Marcos Jr. ng isang nakatuon at malinaw na adyenda para sa pag-unlad ng bansa, at pinangunahan ni Speaker Faustino ‘Bojie’ G. Dy III ang Kamara upang maisulong ang adyendang ito mula sa antas ng mga komite hanggang sa plenaryo nang may disiplina at agarang pagkilos. Muling magbubukas ang sesyon na may mga panukalang handa nang pagdesisyunan dahil ang oras ng lehislatura ay dapat magbunga ng kongkretong resulta para sa sambayanang Pilipino,” ani Marcos.

Sa simula, tinukoy ni Pangulong Marcos at ng mga lider ng Kongreso ang 44 na panukala sa ilalim ng Common Legislative Agenda ng Ika-20 Kongreso bago kalaunang aprubahan ng LEDAC ang mas agarang hanay ng 21 prayoridad na panukalang nakatuon sa panlipunang proteksyon, pagpapalawak ng oportunidad sa ekonomiya, pananagutang pamamahala, at pagpapabuti ng mga serbisyong pampubliko.

Nagsagawa ang Kamara ng sine die adjournment matapos maaprubahan sa ikatlo at pinal na pagbasa ang kalahati ng 52 prayoridad ng LEDAC, kasabay ng maraming pambansa at lokal na panukalang batas na naipadala na sa Senado para sa kaukulang pagtalakay.

Sa pagbubukas ng Ikalawang Regular na Sesyon sa Hulyo 27, kasabay ng State of the Nation Address (SONA) ng Pangulo, inihahanda ng pamunuan ang mga natapos na committee report at naipamahaging kopya ng mga panukalang batas upang agad na maisalang sa plenaryo, sa halip na mawalan ng momentum ang mga nakabinbing panukala.

Ang dalawang panukalang nakahanda na ngayon para sa pinal na pagdedesisyon ay tumutugon sa kompensasyon para sa pinsalang dulot ng insidenteng nukleyar, mga kinakailangang pag-amyenda sa Cooperative Code, at paglikha ng isang taunang pambansang pagdiriwang.

Ang mga pag-amyenda sa Cooperative Code ay sumusuporta sa mas malawak na layunin ng pagpapalawak ng kabuhayan, akses sa pautang, at oportunidad sa pamilihan para sa mga komunidad.

Samantala, ang panukalang National Thanksgiving Day ay sumasalamin sa isa pang mahalagang bahagi ng gawain ng Kamara, na kinabibilangan ng mga panukalang may kaugnayan sa sibiko at institusyonal na pagpapaunlad, bukod pa sa malalaking panukalang pang-ekonomiya at panlipunang reporma na itinakda ng LEDAC.

Ang pagiging handa ng mga panukalang ito para sa pinal na aksyon ay bunga ng maayos na koordinasyon ng mga komite, ng Committee on Rules, at ng iskedyul ng plenaryo bago ang pagtatapos ng Unang Regular na Sesyon.

“Inaasahan ni Pangulong Marcos na ang sangay ng Lehislatibo at Ehekutibo ay patuloy na makasasabay sa mga pangangailangan ng bansa. Ang tatlong panukalang ito ay bahagi ng mas malawak na hanay ng mga panukalang kinabibilangan ng mga prayoridad ng LEDAC, mahahalagang pambansang reporma, at mga panukalang patungo na sa bicameral deliberation o pagtalakay ng Senado,” dagdag ni Marcos.

Inaasahan ng pamunuan ng Kamara na higit pang mapapalawak ang mga naisakatuparan nito sa pamamagitan ng pagsusulong ng karagdagang mga prayoridad ng LEDAC bago matapos ang taon, habang ipinagpapatuloy naman ng mga komite ang teknikal na pag-aaral sa mga panukalang nangangailangan pa ng mas malawak na konsultasyon.

Kapag tuluyang naaprubahan ang dalawang panukalang batas, agad itong maidaragdag sa mga naging lehislatibong tagumpay ng Kamara at maipapadala sa Senado para sa kaukulang aksyon, habang sinisimulan ng Kapulungan ang panibagong sesyon na nakatuon sa pagsasabatas ng mga prayoridad ng administrasyon.