HINILING ng House prosecution panel nitong Martes sa Senate impeachment court na bitawan ang tatlo sa apat na articles of impeachment laban kay Vice President Sara Duterte at isalalay ang kaso sa unexplained wealth. Nagbabala naman ang depensa na kung layon nitong madaliin ang hatol, maaari itong mauwi sa mistrial.

Hindi pa pinal ang pagbawi.

Ayon kay Presiding Officer Sen. Francis “Chiz” Escudero, nasa hurisdiksiyon na ng korte ang mga artikulo kapag naihain na, kaya ituturing niyang mosyon ang manipestasyon ng prosekusyon.

Nagpatawag siya ng recess para konsultahin ang mga senator-judge.

“Once articles of impeachment are filed before the court or any complaint filed before any court for that matter, it is already subject to and under the jurisdiction and disposition of the court, not by the party,” ani Escudero.

Sa pasalitang manipestasyon, sinabi ni lead prosecutor at Batangas Rep. Gerville Luistro na hindi na itutuloy ng prosekusyon ang Article I sa confidential funds, Article III sa bribery at Article IV sa threats.

“Today, the prosecution respectfully manifests that it will no longer pursue three of them. It will stand on one, and that is Article II, Unexplained Wealth,” ani Luistro.

“All in, po, tayo dito,” dagdag niya.

Ayon kay Luistro, sapat ang ebidensiya para tumayo nang mag-isa ang Article II, na sumasaklaw sa unexplained wealth, mga paglabag sa SALN at ipinagbabawal na business interests.

“We believe that evidence is substantial and compelling and warrants the respondent’s removal from office,” aniya.

Sinabi rin ni Luistro na hindi pa naghahain ang prosekusyon ng formal offer of documentary evidence. Aniya, kapag isang artikulo na lamang ang tinutukan, kumikitid ang mga usaping kailangang pagpasyahan ng korte.

Sa Article IV, tatlo sa 10 pinangalanang testigo ang iniharap ng prosekusyon. Sa Article I, 11 sa 27 ang iniharap. Sa Article II, 11 sa 15 ang iniharap, hindi pa kasama ang mga testigo mula sa bangko at insurance. Wala namang iniharap sa limang testigo para sa Article III. Ayon kay Luistro, humigit-kumulang 32 testigo ang hindi na ipatatawag.

Binanggit din ni Luistro ang impeachment trial ni dating Chief Justice Renato Corona, kung saan binawi rin ng prosekusyon ang ilang artikulo. Isinumite niya ang manipestasyon sa korte “for its consideration and appropriate action.”

Sinabi ni defense lead counsel Atty. Sheila Sison na iginagalang nila ang desisyon. Gayunman, iginiit niyang narinig na ng korte at ng publiko ang mga akusasyon sa loob ng 38 araw ng paglilitis.

“The prosecution cannot be allowed to have the benefit of its accusations without bearing the burden of having those accusations tested,” ani Sison.

Ayon kay Sison, kung layon ng pagbawi na paikliin ang paglilitis para agad humantong sa hatol, lalabas na may “unmistakable characteristics of a mistrial” ang proseso.

“But that prerogative to withdraw an accusation is not the power to suppress its rebuttal on the part of the respondent,” dagdag niya.

Iginiit din ni Sison na sa kaso ni Corona, binawi ang lima sa walong artikulo bago iharap ang ebidensiya, at hindi pagkatapos.

Nang tanungin ni Escudero kung tumututol ang depensa, sinabi ni Sison na manipestasyon lamang ito at hindi pagtutol.

“I’m just making a manifestation on behalf of the defense and the respondent that we will proceed as we deem fit, Your Honor,” aniya.

Sumagot si Luistro sa pamamagitan ng counter-manifestation.

“Neither is it the intention of the prosecution to cause unfairness or injustice on the part of the respondent,” aniya.

Binanggit ni Luistro ang pagkainip ng publiko dahil, aniya, ang mga paratang ding ito ang laman ng unang impeachment noong 2024. Binanggit din niya ang iba pang tungkulin ng Senado, kabilang ang pagdinig sa panukalang 2027 General Appropriations Act.

Nauna nang naghain ang prosekusyon noong Oktubre 6 ng manipestasyon na hindi na nito itutuloy ang Article III.