INANUNSYO ni Manila City Mayor Francisco “Isko” Moreno Domagoso ang pag-aresto sa limang tindero sa na nagbebenta ng mga expired na produktong pagkain na nagkakahalaga ng humigit-kumulang P950,000 at pakikialam sa mga expiration label, Miyerkules ng tanghali.

Ang mga suspek na naaresto Martes ng gabi ay nakilalang sina alyas Melvin, Allen, John Clifford, Analyn, at Geelyn.

“Napakadelikadong sitwasyon ito na posibleng mangyari pa sa ibang bahagi ng Maynila. Maaari tayo’y makatipid dahil sa ito ay mura, pero hindi ho lahat ng mura ay maganda. Baka mayroon hong dahilan kung bakit ito mura,” paalala ng alkalde.

Batay sa report ng MPD intelligence, nagsagawa ng surveillance at validation ang mga operatiba ng Special Mayor’s Reaction Team (S.Ma.R.T) sa ilalim ni Police Lt. Col. Edward Samonte, kasama ang mga tauhan ng Plaza Miranda Police Community Precinct (PCP) sa pangunguna ni Police Major Fredwin L. Sernio.

Narekober ng mga awtoridad ang iba’t ibang expired na produktong pagkain at paninda na nagkakahalaga ng humigit-kumulang P950,000, gayundin ang tatlong tampering device na ginamit upang baguhin at muling i-print ang expiration date sa mga produkto.

“Actual na naaktuhan po natin na nagbebenta itong mga suspects ng mga expired products,” saad ni PLt.Col. Samonte kay Yorme Isko habang nasa programa na “Talk to the People.”

Sa pagbanggit sa impormasyon ng pulisya, ibinunyag ni Domagoso na natagpuan din ng mga imbestigador ang mga suspek na nililinis at binabago ang mga label ng petsa sa loob ng isang comfort room sa ikalawang palapag ng establisyimento.

“Kahit gabi, kahit madaling araw, pipilitin po nating maging sanhi ng paglingkuran at ipang-ibabaw sa ating pananaw ang inyong kapakanan at kaligtasan,” saad ng butihing alkelde .

“Hindi po namin ito tutulugan. May gobyerno po sa Lungsod ng Maynila at ito’y pananatilihin namin,” he said.

Ipinaalam sa mga suspek ang uri ng kanilang pag-aresto at ang kanilang mga karapatan sa konstitusyon, pagkatapos ay dinala sa Justice Abad Santos Medical Center para sa medikal na pagsusuri bago dinala sa tanggapan ng S.Ma.R.T para sa dokumentasyon.

Sasampahan ang mga suspek ng paglabag sa Republic Act (RA) 7394 o Consumer Act of the Philippines at RA 10611 o Food Safety Act of 2013.