ANIM ang naaresto dahil sa paglabag sa oil pilferage law at mahigit P3.5 milyon na halaga ng patalsik na gasolina o “paihi” ang nakumpiska sa raid sa hotel and resort compound sa Brgy. San Antonio 1,San Pablo City noong Abril 8.

Nahuli ang anim na suspek sa pamamagitan ng drone sa aktong nagdi-dispense ng petroleum products, ayon sa mga arresting agents ng Regional Mobile Force Battalion 4A at 402nd Maneuver Company Personnel.

Narekober ng mga pulis ang isang orange oil tanker na may halagang P2 milyon, 54 tangke na may halagang P351,000, 8,800 litro ng gasolina, 5 electric pumps, 20-foot pressure hose, 7 steel drums, 1 steel funnel at 21 na walang laman 25-liter containers na may kabuuang halaga na P3,513,050.