PITO ang patay at hindi bababa sa 30 ang nasugatan sa banggaan ng mini-dump truck at pick-up truck nitong Martes ng gabi sa Barangay Bolo, Labrador, Pangasinan.

Batay sa inisyal na ulat, pababa ng bundok ang dalawang sasakyan nang mawalan ng kontrol at mag-malfunction ang preno ng mini-dump truck na may lulang 25 trabahador.

Dahil sa bilis ng pagbulusok ng mini-dump truck, nahagip nito ang pick-up na may lulang 12 pasahero.

Tuluyang bumulusok ang dalawang sasakyan sa bangin dahilan upang masawi ang pitong pasahero ng dump truck.

Sugatan at nagtamo ng minor injuries ang iba pang pasahero ng dalawang sasakyan.

Patuloy ang imbestigasyon sa aksidente.