TINUTULAN ng eksperto sa forensic accounting ng House prosecution panel ang paulit-ulit na pagtukoy ng depensa sa kanyang mga natuklasan bilang “umano” lamang, at iginiit na hindi ginamit ang naturang salitang kwalipikasyon sa kanyang ulat tungkol sa hindi maipaliwanag na yaman ni Vice President Sara Duterte.

Kinuwestiyon ni Atty. Alexander Cabrera, chairman emeritus ng Isla Lipana & Co. (PwC Philippines), ang pahayag ni defense counsel Kristine Ferrer matapos nitong tukuyin bilang “umano” ang mga interes sa negosyo na sinuri sa kanyang ulat.

“Wala pong nakalagay na alleged sa report ko po,” pahayag ni Cabrera.

“Sabi niyo po you’re reading my report po, eh,” sagot naman ng eksperto.

Naganap ang palitan ng mga pahayag habang tinatanong ni Ferrer si Cabrera tungkol sa pagpapahalaga sa mga interes sa negosyo na iniugnay kay Duterte at sa kanyang asawang si Atty. Manases Carpio.

Inamin ni Cabrera na hindi nagsagawa ang kanyang pangkat ng pormal na pagpapahalaga sa halaga ng mga negosyo dahil sa kakulangan ng impormasyon at limitadong panahon.

Kinumpirma rin niyang humigit-kumulang tatlong linggo ang inilaan sa pagsusuri ng mga rekord sa bangko. Gayunman, nilinaw niyang sinimulan na ang pagsusuri sa iba pang mga dokumento noong Hunyo, ilang buwan bago matapos ang ulat noong Oktubre 2.

Tinanong din ng depensa si Cabrera kung mayroon siyang personal na kaalaman kung alam ni Duterte ang tungkol sa ilang bank account at insurance policy na may kaugnayan sa kanyang asawa.

“Personal knowledge po? Wala po,” sagot ni Cabrera nang tanungin kung alam niya kung batid ng Bise Presidente ang tungkol sa isang bank account na tinalakay sa cross-examination.

Tungkol sa mga insurance policy ni Carpio, ipinaliwanag ni Cabrera na ginamit sa kanyang pagsusuri ang prinsipyo ng absolute community of property na tumutukoy sa pagsasama ng mga ari-arian ng mag-asawa alinsunod sa naaangkop na batas.

Inamin din niyang wala siyang personal na kaalaman kung alam ni Duterte ang tungkol sa mga naturang insurance policy.

Kinumpirma rin ni Cabrera na nakabatay ang pagsusuri ng kanyang pangkat sa mga available na dokumentong pinansiyal at hindi nila personal na kinapanayam sina Duterte, Carpio o dating Pangulong Rodrigo Duterte tungkol sa mga account na kanilang sinuri.