ITINALAGA ni Pangulong Ferdinand R. Marcos Jr. si Eric Jose Castro Ines bilang acting General Manager at miyembro ng Board of Directors ng Manila International Airport Authority (MIAA).

Isang transmittal letter ang ipinadala kay Transportation Secretary Jaime Bautista ang ipinadala ni Executive Secretary Lucas P. Bersamin upang ipaalam ang pagtatalaga kay Ines.

Papalitan ni Ines si dating MIAA chief Cesar Chiong.

Ang MIAA ay isang attached agency ng Department of Transportation (DOTr).

Si Ines ay isang Bachelor of Arts graduate ng University of the Philippines. Siya ay nagtapos ng Airport and Airline Management and Aviation Security course sa Bailbrook College, School of Aviation sa United Kingdom.

Si Ines ay dating airport station manager ng Etihad Airways at Gulf Air sa Maynila.

Dati rin siyang Senior Security Officer ng Gulf Air sa Maynila at Southeast Asia at trainee para sa Airline Operations ng kaparehong kompanya.

Si Ines ay dati ring Senior Executive Assistant to the Secretary ng Department of Local Government and Community Development (DLGCD).