𝗡𝗔𝗡𝗜𝗡𝗜𝗗𝗜𝗚𝗔𝗡 𝗮𝗻𝗴 𝗖𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗗𝗮𝗻𝗴𝗲𝗿𝗼𝘂𝘀 𝗗𝗿𝘂𝗴𝘀 𝗻𝗮 𝘀𝗶 𝗦𝘂𝗿𝗶𝗴𝗮𝗼 𝗱𝗲𝗹 𝗡𝗼𝗿𝘁𝗲 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗯𝗲𝗿𝘁 𝗔𝗰𝗲 𝗦. 𝗕𝗮𝗿𝗯𝗲𝗿𝘀 𝗻𝗮 𝗮𝗻𝗴 𝗽𝗶𝗻𝗮𝗸𝗮-𝗹𝗮𝘆𝘂𝗻𝗶𝗻 𝗻𝗴 𝗤𝘂𝗮𝗱 𝗖𝗼𝗺𝗺𝗶𝘁𝘁𝗲𝗲 𝗻𝗴 𝗞𝗮𝗺𝗮𝗿𝗮 𝗱𝗲 𝗥𝗲𝗽𝗿𝗲𝘀𝗲𝗻𝘁𝗮𝗻𝘁𝗲𝘀 𝗮𝘆 𝗮𝗻𝗴 𝗺𝗮𝗽𝗮𝗹𝗮𝗯𝗮𝘀 𝗮𝗻𝗴 𝗯𝘂𝗼𝗻𝗴 𝗸𝗮𝘁𝗼𝘁𝗼𝗵𝗮𝗻 𝗽𝗮𝘁𝘂𝗻𝗴𝗸𝗼𝗹 𝘀𝗮 𝗺𝗴𝗮 𝗽𝗮𝗻𝗴𝘂𝗻𝗮𝗵𝗶𝗻𝗴 𝗶𝘀𝘆𝘂 𝗻𝗮 𝗶𝗻𝗶𝗶𝗺𝗯𝗲𝘀𝘁𝗶𝗴𝗮𝗵𝗮𝗻 𝗮𝘁 𝗯𝗶𝗻𝘂𝗯𝘂𝗻𝗴𝗸𝗮𝗹 𝗻𝗴 𝗮𝗽𝗮𝘁 𝗻𝗮 𝗽𝗶𝗻𝗮𝗴𝘀𝗮𝗻𝗶𝗯 𝗻𝗮 𝗞𝗼𝗺𝗶𝘁𝗲.

Ito ang muling binigyang diin ni Barbers sa gitna ng mga pinalulutang na alingas-ngas at alegasyon ng kampo ni dating Pangulong Rodrigo Roa Duterte na ang isinasagawang pagsisiyasat ng Quad Committe ay isang “political persecution” lamang laban sa kaniyang pamilya.

Dahil dito, agad na dumepensa si Barbers sa pagsasabing ang katotohanan aniya ang nais malaman ng Quad Committee patungkol sa mga pangunahing usapin gaya ng Extra-Judicial Killings (EJK), war-on-drugs campaign ng nakalipas na administrasyon at ang illegal operations ng Philippine Offshore Gaming Operators (POGO).

Sabi pa ni Barbers na walang katotohanan at pawang haka-haka lamang ang mga pinalulutang ng kampo ng dating Pangulo kung saan ipinagkakalat aniya nila na ang puntirya ng kanilang isinasagawang imbestigasyon ay ang pamilya Duterte.

Pagdidiin pa ng kongresista na kung sa pagpapatuloy ng kanilang pagsisiyasat ay may mga masasagasaan at matatamaan para lumabas ang katotohanan ay iyon ang kanilang pangangatawanan.

Paliwanag ni Barbers na ang pinaka-objective ng kanilang imbestigasyon ay ang mabigyan ng katarungan ang mga napatay na inosenteng sibilyan at ilang indibiduwal kaugnay sa madugong war-on-drugs ng nakalipas na adninistrasyon.

“Kung mayroong along the way na may matatamaan o kaya ay may masasagasaan at kung iyan ang magpapalabas ng katotohanan. Iyan po ang aming ilalabas at pangangatawanan,” sabi pa ni Barbers.