𝗡𝗔𝗡𝗜𝗡𝗜𝗪𝗔𝗟𝗔 𝘀𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗻𝗮 𝗵𝗶𝗻𝗱𝗶 𝗵𝗮𝗺𝗮𝗸 𝗻𝗮 𝗺𝗮𝘀 𝗺𝗮𝗴𝗶𝗴𝗶𝗻𝗴 𝗺𝗮𝗴𝗮𝗻𝗱𝗮, 𝗺𝗮𝗮𝘆𝗼𝘀 𝗮𝘁 𝗼𝗿𝗴𝗮𝗻𝗶𝘀𝗮𝗱𝗼 𝗻𝗴𝗮𝘆𝗼𝗻 𝗮𝗻𝗴 𝗽𝗮𝗺𝗮𝗺𝗮𝗹𝗮𝗸𝗮𝗱 𝘀𝗮 𝗗𝗲𝗽𝗮𝗿𝘁𝗺𝗲𝗻𝘁 𝗼𝗳 𝗘𝗱𝘂𝗰𝗮𝘁𝗶𝗼𝗻 (𝗗𝗲𝗽𝗘𝗱) 𝘀𝗮 𝗶𝗹𝗮𝗹𝗶𝗺 𝗻𝗴 𝗽𝗮𝗺𝘂𝗺𝘂𝗻𝗼 𝗻𝗴 𝗱𝗮𝘁𝗶𝗻𝗴 𝗦𝗲𝗻𝗮𝗱𝗼𝗿 𝗻𝗮 𝘀𝗶 𝗦𝗲𝗰. 𝗘𝗱𝗴𝗮𝗿𝗱𝗼 “𝗦𝗼𝗻𝗻𝘆” 𝗔𝗻𝗴𝗮𝗿𝗮 𝗱𝗮𝗵𝗶𝗹 𝗻𝗮𝗿𝗶𝗻 𝘀𝗮 𝗸𝗮𝗻𝗶𝘆𝗮𝗻𝗴 𝗺𝗮𝗵𝘂𝘀𝗮𝘆 𝗻𝗮 “𝘁𝗿𝗮𝗰𝗸 𝗿𝗲𝗰𝗼𝗿𝗱”.

Ito ang pananaw ni Valeriano, Chairman ng House Committee on Metro Manila Development, na sa nakikita nito ay magiging maayos ang pagpapatakbo ng naturang ahensiya kumpara sa dating namamahala dito na nag-iwan ng kaliwa’t-kanang kontrobersiya at eskandalo patungkol sa usapin ng intelligence fund.

Sinang-ayunan din ni Valeriano ang opinyon ng kapwa nito kongresista na nagsabi na tamang tama si Angara para maging Kalihim ng DepEd dahil sa pagiging accommodating nito at ang pagkakaroon nito ng malasakit para sa mga guro sa pamamagitan ng pagsusulong nito ng mga panukalang batas para itaas ang sahod ng mga teachers.

Ikinadismaya din ng kongresista ang nalantad o nabunyag sa pagdinig ng House Committee on Appropriations tungkol sa P793.18 bilyong budget ng DepEd kasama na ang mga attached agencies nito para sa 2025. Kung saan, natuklasan na napakaraming problema ang iniwan ng dating Kalihim ng DepEd na si Vice-President Inday Sara Duterte.

Sabi ni Valeriano na kabilang sa mga problemang iniwan ni VP Sara ay ang MATATAG Curiculum na nagdulot aniya ng napakalaking pahirap para sa mga guro sa high school na ngayon ay mayroong 7-8 load kada araw na ang bawat klase ay tumatagal ng 45 minuto.

Nauna rito, iminumungkahi naman ni House Assistant Majority Leader at Lanao del Sur 1st Dist. Cong. Zia Alonto Adiong sa DepEd na papanagutin ang mga supplier na nabigong matupad ang kontrata para sa Last Mile Schools Program noong panahon ni dating Pangulong Rodrigo Roa Duterte hanggang sa pamunuan ni VP Sara Duterte ang DepEd bilang Kalihim.

Paliwanag ni Adiong na 50% lang ng P20.54 bilyong pondo ang nagamit na maituturing aniya na isang “disservice” sa mga mag-aaral na nasa malayong lugar gaya ng lalawigan.