SI Brigadier General Nicolas D. Torre III, kilala bilang tagapag-usig ni Pastor Apollo C. Quiboloy, ay pormal na itinalaga bilang ika-49 na director ng Philippine National Police Criminal Investigation and Detection Group (PNP-CIDG) nitong Huwebes.

Si Lieutenant General Jon A. Arnaldo, Chief Directorial Staff ng PNP ang namuno sa seremonya ng turnover ng pamumuno kina Brig. Gen. Torre at dating PNP-CIDG director, Major General Leo M. Francisco, na ginanap sa Camp Crame.

Nagpahayag si Torre, miyembro ng PNP Academy ‘Tagapagtaguyod’ Class of 1993, ng kanyang taos-pusong pasasalamat sa pamunuan ng PNP sa pangunguna ni General Rommel Francisco D. Marbil sa pagtitiwala at pagbibigay ng kumpiyansa sa kanya upang pamunuan ang pangunahing yunit ng imbestigasyon ng PNP.

Bilang dating direktor ng Police Regional Office 11 sa Southern Mindanao, kinilala rin ni Torre ang mga makabuluhang nagawa ni Maj. Gen. Francisco at binigyang-diin ang kanyang pagiging pamilyar sa operasyon ng CIDG, dahil nagsilbi na rin siyang Deputy Director for Operations ng yunit.

Sa kanyang pahayag, binigyang-diin ni Brig. Gen. Torre na ang pagkakaisa at teamwork ang mananatiling mahalaga sa patuloy na tagumpay ng CIDG.

Samantala, binalikan ni Maj. Gen. Francisco, miyembro ng Philippine Military Academy ‘Tanglaw-Diwa’ Class of 1992, ang kanyang panunungkulan at binanggit ang mga pangunahing tagumpay ng CIDG, kabilang ang pagsugpo sa ilang illegal POGO hubs na ginawang ‘scam farms’ sa bansa, partikular sa Porac, Pampanga, pati na ang pagkumpiska ng daan-daang milyong halaga ng mga smuggled na sigarilyo at ilegal na refilled liquefied petroleum gas.

Naging mahalaga rin ang PNP-CIDG sa pagkakahuli ng ilan sa pinakamatataas na terorista at kriminal sa bansa.

“I couldn’t have achieved this alone. These successes were due to the relentless efforts of the entire CIDG team, from ground operatives to investigators and administrative staff. It was a collective effort, and I am proud to have led such a dedicated unit,” ayon kay Maj. Gen. Francisco.

Sa ngalan ni Gen. Marbil, pinuri ni Lt. Gen. Arnaldo ang kapwa lider para sa kanilang natatanging serbisyo, partikular na binibigyang-diin ang mahusay na pamumuno ni Francisco.

Pinuri ng opisyal ang mga mahahalagang ambag ni Maj. Gen. Francisco sa pambansang seguridad at kaligtasan ng publiko, na hindi lamang nagbigay proteksyon sa mga marurupok na sektor kundi nagpatibay din sa dedikasyon ng CIDG sa katarungan at pagsunod sa batas.

Ipinaabot din ni Lt. Gen. Arnaldo ang kanyang tiwala sa kakayahan ni Brig. Gen. Torre na pamunuan ang CIDG.

“Brig. Gen. Torre’s extensive experience in handling complex criminal investigations and his dedication to public service make him the right person to lead CIDG. I am confident that under his leadership, CIDG will continue its relentless efforts to combat crime and protect the public,” ani ng opisyal.

Tiniyak ni Brig. Gen. Torre sa bansa na ipagpapatuloy niya ang pamana ng kahusayan na nagbigay-kilala sa CIDG bilang pangunahing yunit ng imbestigasyon ng pambansang pulisya, at patuloy siyang magsusumikap na hanapin ang katotohanan at hulihin ang mga fugitive mula sa hustisya.