NANAWAGAN si Senadora Risa Hontiveros para sa mas pinaigting na pagsupil sa mga underground Philippine Offshore Gaming Operators (POGOs), matapos ang mga ginawang raid ng Presidential Anti-Organized Crime Commission (PAOCC) na nagbunyag sa patuloy na operasyon ng mga ilegal na POGO kahit pa pinatutupad na ng gobyerno ang pagpapasara ng mga legal na POGO.

Naglabas ng pahayag si Hontiveros matapos ihayag ni PAOCC Spokesperson Winston Casio na posibleng may higit sa 100 ilegal na POGO hubs pa rin na nagpapatakbo ng underground operations sa buong bansa.

Ayon kay Casio, “Ang problema talaga natin ay ‘yung mga illegal talaga from the get-go. Yung sa umpisa palang illegal na talaga sila, underground na po sila.” Ipinaliwanag niyang ang mga operasyon na dating may daan-daan o libong empleyado ay naghiwa-hiwalay na sa mas maliliit na yunit, kaya mas mahirap silang habulin at mas laganap.

“‘A ban is a ban.’ Kung ang mga POGO ay magpapatuloy pa rin matapos ang deadline ng Disyembre, dapat pa rin silang tugisin ng gobyerno,” diin ni Hontiveros, na binigyang-diin ang pangangailangan na ipagpatuloy ang presyon sa mga natitirang underground POGO networks.

Pinuri ni Hontiveros ang pagsisikap ng PAOCC at iba pang ahensya na bahagi ng crackdown ngunit hinimok ang gobyerno na dagdagan pa ang mga resources ng task force upang tuluyang masira ang mga underground networks na ito.

Binigyang-diin din niya ang pangangailangang imbestigahan ang mga lokal na opisyal ng pamahalaan na posibleng nagpoprotekta sa mga ilegal na operasyon.

“Maaaring magtapos na ang mga pagdinig ng Senado, ngunit dapat ipagpatuloy ang laban sa ilegal na POGOs. Kailangang tiyakin natin na ang lahat ng criminal networks ay tuluyang mawawasak at mapanagot,” pagtatapos niya.