NABAHALA si Bureau of Immigration (BI) Commissioner Joel Anthony Viado sa pagtaas ng mga kaso ng trafficking ng kababaihan para sa ilegal na surrogacy sa ibang bansa.

Sa pahayag, ibinahagi ni Viado ang pagharang sa isa pang biktima na nagtangkang umalis ng bansa upang magtrabaho bilang surrogate mother kapalit ng kalahating milyong piso.

Ang 37-taong gulang na biktima ay naharang nitong Oktubre 15 sa Ninoy Aquino International Airport (NAIA) Terminal 3 matapos magtangkang sumakay ng Turkish Airlines papuntang Batumi, Georgia.

Iniulat ng immigration protection and border enforcement section (I-PROBES) ng BI na unang nagpakilala ang biktima bilang isang sales associate at naglalakbay papuntang Georgia para sa layuning pang-negosyo.

Gayunpaman, napansin ng BI agents ang mga pagkakaiba sa kanyang mga pahayag.

Sa mga panayam, inamin niya na siya ay na-recruit bilang isang surrogate mother para sa hindi pinangalanang kliyente.

Inamin ng biktima na isang lalaking recruiter ang kumontak sa kanya sa pamamagitan ng WhatsApp, na nag-aalok ng P28,000 kada buwan habang siya ay nagdadalang-tao at higit sa P500,000 matapos manganak.

Ang recruiter ay nangakong sasagutin ang kanyang mga gastusin sa medikal at iba pang benepisyo, bukod pa sa pagproseso ng kanyang mga dokumento at paglalakbay.

Ibinahagi ni I-PROBES Chief Mary Jane Hizon na ang kasong ito ay kumakatawan sa isang bagong uri ng human trafficking scheme, na nag-uugnay sa sapilitang paggawa sa mga kasunduan sa surrogacy.

Ang mga babaeng biktima ay unang inaalok ng magagandang kondisyon ng pamumuhay ngunit sa kalaunan ay nahaharap sa pagsasamantala at pang-aabuso.

Ito na ang ikapitong naitalang kaso ng surrogate mothers na naharang sa mga paliparan, na nagpapakita ng nakakaalarmang trend ng mga indibidwal na nalilinlang na pumasok sa ganitong mga papel sa ilalim ng maling mga pangako.

Nitong unang bahagi ng buwan, 20 Pilipinang ang nailigtas ng mga awtoridad ng Pilipinas matapos gawing surrogate mothers sa Cambodia.

Kinondena ni Commissioner Viado ang scheme na ito, at sinabing ang pagsasamantala sa surrogacy ay sakop ng human trafficking, dahil pinipilit o nililinlang ang mga kababaihan upang maging surrogate mothers.