TALAVERA, Nueva Ecija – Isang 69-anyos na lolo na tinaguriang number one most wanted man ng bayang ito dahil sa dalawang kaso ng statutory rape at tatlong counts ng acts of lasciviousness ang nasakote sa manhunt operations na isinagawa sa bulubunduking bayan ng Pantabangan nitong Lunes.

Sinabi ni police head Lt. Col. Marlon M. Cudal na ang suspect, residente ng Bgy. Caaninaplahan dito, ay naaresto sa kanyang hideout sa Km.6, Bgy. Malbang dakong alas-3:30 ng hapon.

Isinilbi ng mga awtoridad ang dalawang warrant of arrest na inisyu laban sa suspek ng Regional Trial Court Branch 88 ng Baloc, Santo Domingo, Nueva Ecija noong Enero 2, 2025 na walang inirekomendang piyansa para sa dalawang bilang at P102,000 para sa tatlong bilang ng acts of lasciviousness.

Ang umano’y biktima ng panggahasa ay siyam na taong gulang na batang babae na alaga ng ka-live-in ng suspek, sinabi ni Cudal.

Nakakulong na ngayon sa kanyang selda ang naarestong suspek para sa kaukulang disposisyon.