KASABAY ng pagdiriwang ng “World Cancer Day” muling binigyang diin ni House Assistant Majority Leader at Quezon City 5th Dist. Rep. Patrick Michael “PM” D. Vargas ang kaniyang pangakong tutulungan ang mga kababaihang may breast cancer.

Tiniyak ng House Assistant Majority Leader na patuloy nitong tinututukan ang agarang pag-aapruba ng Kamara de Representantes sa panukalang batas na naglalayong maitatag ang Mammography at Breast Cancer Center sa kaniyang distrito (Novaliches).

Optimistiko naman si Vargas na maaaprubahan ng Mababang Kapulungan bago matapos ang sine-die adjournment nito ang House Bill No. 3500 na pinamagatang “An Act Establishing a Mammography and Breast Cancer Center in Novaliches”.

Ipinaliwanag ni Vargas na layunin ng House Bill No. 3500 na magkaroon ng accessible, affordable, may kalidad na breast cancer screening, diagnosis at treatment service para sa mga kababaihang residente ng Lungsod Quezon na may breast cancer.

“Breast cancer remains the most common cancer among Filipinas with thousands of new cases detected annually. Through this bill, we aim to bring essential breast cancer services through early detection and proper treatment particularly in District V where access to specialized health care remains a challenge,” sabi ni Vargas.

Sinabi pa ng kongresista na ang inaasam nitong Mammography and Breast Cancer Center ay magtataglay ng mga modernong kagamitan gaya ng mga “state-of-the-art” facilities para sa breast cancers screening, early diagnosis at patient support program.

“We understand the emotional, physical and financial toll that the disease takes in every affected family,” wika pa nito.