ANG mga ebidensyang gagamitin sa International Criminal Court (ICC) kaugnay ng extrajudicial killings (EJKs) sa war on drugs campaign ni dating Pangulong Rodrigo R. Duterte ay maaari ring magamit sa impeachment trial ni Vice President Sara Duterte, ayon sa isang miyembro ng House prosecution panel.

Sinabi ni House Assistant Majority Leader Jil Bongalon ng Ako Bicol Party-list na bukas ang prosekusyon sa paggamit ng bagong ebidensya mula sa ICC kung ito ay makapagpapalakas sa impeachment case.

“We can consider that because again, all evidence that will of course make our case more strong or stronger, definitely can be used against the impeachment complaint,” ani Bongalon.

Binanggit niya na bagama’t naisampa na sa Senado ang Articles of Impeachment at kasama rito ang maraming ebidensya, maaari pa ring isaalang-alang ang bagong testimonial evidence o karagdagang mga saksi.

“If there are other testimonial evidence, other witnesses who are willing to testify before the Senate sitting as an impeachment trial court, definitely we can consider that,” dagdag niya.

Gayunpaman, binigyang-diin ni Bongalon na anumang bagong ebidensya ay dapat munang pag-aralan at pag-usapan ng mga pampubliko at pribadong prokurador na humahawak sa kaso.

Samantala, nagbigay rin ng reaksyon si Bongalon sa mga ulat na lumipad patungong Netherlands si VP Duterte matapos arestuhin ang kanyang amang si dating Pangulong Duterte, na ngayon ay patungo na sa The Hague para humarap sa paglilitis ng ICC.

“The first thing that comes on my mind probably, nawalan na po ng isang defense lawyer si VP Sara, right?” ani Bongalon.

Ipinunto niya na dati nang ipinahayag ng dating pangulo ang kanyang kagustuhang magsilbing legal counsel ng kanyang anak sa impeachment case nito.

“Kasi ‘di ba nung pumutok ‘yung issue about the impeachment, isa sa mga nag-signify that will stand as a legal counsel will be former President Rodrigo Roa Duterte,” paliwanag niya.

Kinumpirma rin ni Bongalon, na isa sa mga House prosecutors, na siya ay naatasang humawak ng dalawang mahahalagang Articles of Impeachment laban sa pangalawang pangulo.

“Well, I was tasked to handle Article 2 of the Articles of Impeachment plus Article 3. We are given the free will to join other Articles, but I guess these two articles are already enough for me to handle,” aniya.

Ipinaliwanag niya na saklaw ng Article 2 ang umano’y maling paggamit ng confidential funds sa Office of the Vice President (OVP) at Department of Education (DepEd), habang ang Article 3 ay may kinalaman sa panunuhol sa mga opisyal ng DepEd.

“These are the matters that were discussed thoroughly in the investigations of the Committee on Good Government. So, with these two articles for me, sapat na para sa akin i-handle at pag-aralan,” ani Bongalon.

Dagdag pa niya, hinati na ng House prosecution team ang mga articles sa bawat miyembro nito bilang paghahanda sa impeachment trial.