“HINDI ba dapat maayos ang tirahan ng ating mga OFW?”

Ito ang tanong na ipinukol ng Senate Committee on Migrant Workers, matapos magsagawa si Senador Raffy Tulfo ng sorpresang inspeksyon noong Marso 10 sa ilang pansamantalang tirahan ng mga Overseas Filipino Workers (OFW) sa Metro Manila na naghihintay ng kanilang deployment sa ibang bansa.

Ang hakbangin na ito ay kasunod ng mga reklamo mula sa mga OFW hinggil sa mga paglabag sa mga pasilidad na ito.

Kasama ni Tulfo ang mga opisyal mula sa Department of Migrant Workers (DMW), sa pangunguna ni Mylette Andres, Officer-in-Charge Director III ng Licensing and Regulations Bureau, Licensing and Adjudications Services.

Unang tinungo ni Tulfo ang tirahan ng OFWs sa Quezon City. Laking gulat niya nang madiskubre ang “parang preso” na kalagayan ng mga OFW sa loob, kung saan mahigit 40 manggagawa ang siksikan sa isang maliit na bahay na may apat na silid, na wala pang double-deck beds sa bawat kwarto.

Napansin din niya na ang banyo ay walang shower, may inidoro pero walang flush, at walang pinto para sa pribadong paggamit.

Agad niyang tinanong ang may-ari ng pasilidad kung papayagan ba niyang manirahan ang sarili niyang anak sa ganitong kondisyon.

Nakita rin ni Tulfo ang kawalan ng fire extinguisher at fire exits, na mahalaga sa oras ng sunog. Napansin din niyang walang laman ang first-aid kit.

Dumiretso si Tulfo sa isa pang tirahan sa Zamboanga, Quezon City kung saan mahigit 40 OFW rin ang naninirahan.

Pinuna niya ang kawalan ng double-deck beds, mahinang bentilasyon, at kawalan ng emergency exits.
Walang laman ang water dispenser, at may nakapaskil pang abiso sa pinto ng refrigerator na nagbabawal sa mga OFW na palamigin ang kanilang tubig o mag-imbak ng pagkain.

Iminungkahi ni Tulfo na maglagay ng hindi bababa sa tatlong water dispensers na may hot at cold water. Binigyang-diin din niya ang pangangailangan ng isang prayer room hindi lang para sa mga Katoliko kundi para rin sa mga hindi Katoliko—isang mungkahing agad sinuportahan ng isang Muslim OFW na naninirahan doon.

Inilarawan ni Tulfo ang mas malalang kondisyon sa apat na tirahan sa Paco, Maynila, kung saan tila sardinas ang pagkakasiksik ng mga OFW. Sa huli, inatasan ni Tulfo ang DMW na bantayan at tiyakin na susunod ang may-ari ng mga tirahang ito sa mga alituntunin ng ahensya upang makapagpatuloy sa operasyon.

Ayon sa ulat, ang inspeksyong ito ay kasunod ng mga naunang pagbisita ni Tulfo sa Migrant Workers Offices at mga agency shelter sa Dubai at Riyadh, bilang bahagi ng kanyang tungkulin bilang Senate Committee on Migrant Workers Chairperson.

Ang mga hakbang na ito ay bahagi ng kanyang patuloy na pagsisikap na tiyakin ang kapakanan at kaligtasan ng mga OFW, parehong sa loob at labas ng bansa.

Bukod dito, noong Marso 6, 2025, pinangunahan ni Tulfo ang isang public hearing na tumutok sa pagpapatupad ng mas mahigpit na monitoring measures ng DMW at Overseas Workers Welfare Administration (OWWA) upang matiyak ang proteksyon, kaligtasan, at kapakanan ng mga OFW.