PORMAL nang binigyan ng House prosecution panel ng kopya ang tanggapan ni Vice President Sara Duterte ng inihain nitong mosyon para siya ay pasagutin sa Articles of Impeachment ng Kamara de Representantes.

Dinala ng House Secretariat Staff ang kopya ng mosyon sa tanggapan ni VP Duterte sa 11th floor ng Robinsons Cybergate Plaza, Mandaluyong City, alas-11:20 ng umaga ng Miyerkules.

Noong Martes, inihain ng House prosecution panel ang mosyon sa Senado.

Si VP Duterte ay kasalukuyang nasa The Hague, Netherlands, kung saan nakakulong ang kanyang amang si dating Pangulong Rodrigo R. Duterte kaugnay ng kasong crimes against humanity na kinakaharap nito sa International Criminal Court (ICC).

Sa mosyon, hiniling ng House prosecution team kay Senate President at Impeachment Court Presiding Officer Francis “Chiz” Escudero na maglabas ng writ of summons para kay VP Duterte at atasan ito na sagutin ang Verified Complaint for Impeachment na inihain ng Kamara sa loob ng 10 araw mula sa pagtanggap nito.

Ang mosyon na inihain sa Senado ay pirmado nina House Minority Leader Marcelino “Nonoy” Libanan, 1-Rider Party-list Rep. Rodge Gutierrez at House Deputy Majority Leader Paolo Ortega V ng La Union.

Si Libanan ay binigyan ng kapangyarihan ng lahat ng public prosecutor na lumagda sa mga pleadings na ihahain sa impeachment trial.

Ang impeachment complaint laban kay VP Duterte ay nilagdaan ng 215 kongresista at ipinadala sa Senado noong Pebrero 5, 2025, alinsunod sa Section 3, Article XI ng Saligang Batas.

“In case the verified complaint or resolution of impeachment is filed by at least one-third of all the Members of the House, the same shall constitute the Articles of Impeachment, and trial by the Senate shall forthwith proceed,” ayon pa sa mosyon na base sa sinasaad ng Saligang Batas.

Binibigyang-diin din ng dokumento na alinsunod sa umiiral na Rules of Procedure on Impeachment Trials, ang pagpapalabas ng writ of summons ay obligado kapag natanggap na ng Senado ang Articles of Impeachment.

Ang mosyon ay isinampa alinsunod sa Resolution No. 39 na may petsang March 23, 2011, na nagsisilbing gabay sa impeachment proceedings sa Senado.

Sinasaad din sa mosyon ang Rule VII ng Senate’s Rules of Procedure on Impeachment Trials: “A writ of summons shall be issued to the person impeached, reciting or incorporating said articles, and notifying him/her to appear before the Senate upon a day and at a place to be fixed by the Senate and named in such writ, and to file his/her Answer to said articles of impeachment within a non-extendible period of ten (10) days from receipt thereof.”

Dagdag pa ng mga prosecutor, nananatiling epektibo ang Senate Rules maliban kung ito ay babaguhin o pawawalang-bisa, na tinutukoy ang Rule XXV: “These Rules shall take effect immediately upon publication in two (2) newspapers of general circulation and shall remain in force until amended or repealed.”

“Thus, it behooves the Honorable Impeachment Court to give effect to the constitutional mandate for the instant impeachment case to ‘forthwith proceed’ and issue the writ of summons to respondent Duterte,” ayon sa prosecution panel.

Binigyang-diin ng prosecution panel ang obligasyon ng Senado na ipatupad ang constitutional process ng impeachment at tiyakin na ang paglilitis ay “forthwith proceed.”