PINAGTIBAY ng Kamara de Representantes sa botong 177 na pabor at walang tutol, sa ikatlo at huling pagbasa noong Miyerkules ang House Bill No. 11400, o ang panukalang “Act Expanding the Coverage of the Privileges and Benefits Given to Senior Citizens.”

Ang HB No. 11400 ay nagsisilbing substitute bill para sa 24 na panukalang batas na layuning dagdagan o palawakin ang mga benepisyo para sa mga nakatatanda. Nilalayon nitong amyendahan ang Republic Act No. 7432, na kilala bilang “An Act to Maximize the Contributions of Senior Citizens to Nation Building, Grant Benefits, and Special Privileges and for Other Purposes.”

“We Filipinos are known for having a respectful society, and this is rooted in the way we take care of our elders. As legislators, we always look for ways to make life easier and more comfortable for our countrymen who are in their golden years,” ani House Speaker Martin Romualdez.

Isa sa mga pangunahing nilalaman ng panukala ay ang pag-amyenda sa Section 3 ng “Expanded Senior Citizens Act of 2010” kung saan nililinaw ang sakop ng 20% diskuwento sa pagbili ng gamot, food supplements, bayad sa health professionals, toll fees, transport network services, at iba pa—online man o offline.

“It includes online, offline, direct or indirect, first or third-party medium on the 20 percent discount privilege in the purchase of medicines, food supplements and vitamins, health professional fees, golf and country clubs, transport network services, and toll fees on sky-ways, expressways of the senior citizens,” dagdag ni Romualdez.

Nakasaad din sa panukala ang 15% diskuwento sa buwanang konsumo ng kuryente at tubig, kung ang konsumo ay hindi lalampas sa 200 kWh ng kuryente at 50 cubic meters ng tubig. “The billing statement must be under the name of the senior citizen,” paalala ni Romualdez.

Magkakaloob din ng 8.5% special discount para sa pagbili ng pangunahing pangangailangan at pangunahing bilihin.

Bukod dito, maglalaan ng ₱25,000 na tulong pinansyal sa pinakamalapit na kamag-anak ng yumaong senior citizen, na maaaring baguhin batay sa inflation.

Ayon pa sa panukala, hindi kasali sa Unified Vehicular Volume Reduction Program (UVVRP o color-coding scheme) ang mga senior citizen basta’t sila ang nagmamaneho o sakay ng sasakyan, at may maipapakitang ID na nagpapatunay ng kanilang edad.

Libreng parking din ang ibibigay sa mga senior citizen na nagmamaneho o sakay ng pribadong sasakyan, sa lahat ng commercial at government establishments na naniningil ng bayad sa paradahan, basta’t may valid senior citizen ID.

Kung may promotional discount ang isang produkto o serbisyo, maaaring pumili ang senior citizen kung alin ang mas mataas—ang promo o ang diskuwentong nakasaad sa batas.

Papayagan ang mga establisimyento na i-claim ang diskuwento bilang tax deduction base sa halaga ng produktong ibinenta o serbisyong ibinigay, alinsunod sa probisyon ng National Internal Revenue Code (NIRC), basta’t may sapat na dokumentasyon.

Inatasan din ang iba’t ibang ahensya ng gobyerno tulad ng National Commission of Senior Citizens, National Commission of Senior Citizens, Department of Social Welfare and Development, Department of Health, Department of Finance, Department of Trade and Industry, Department of Agriculture, Department of Transportation, Energy Regulatory Commission, Metropolitan Waterworks and Sewerage System, at National Economic and Development Authority na bumuo ng mga patakaran para sa maayos na pagpapatupad ng panukalang batas.

Kabilang sa mga may-akda ng panukala ay sina Representatives Rodolfo Ordanes, Joey Salceda, Marissa “Del Mar” Magsino, Mark Go, Horacio Suansing Jr., Mikaela Angela Suansing, Jefferson Khonghun, Patrick Michael Vargas, Edwin Olivarez, Alfred Delos Santos, Joseph Gilbert Violago, Marvin Rillo, Dan Fernandez, Gus Tambunting, Ernesto Dionisio Jr., Marie Bernadette Escudero, Lordan Suan, Dale Corvera, Ruwel Peter Gonzaga, Emerson Pascual, Loreto Amante, Salvador Pleyto, Milagros Aquino-Magsaysay, Rachel Marguerite Del Mar, Christopherson Yap, at Jane Castro.

Kasama din sa umakda sa panukala sina Gabriel Bordado, Jr., Linabelle Ruth Villarica, Steve Chiongbian Solon, Sonny Lagon, John Tracy Cagas, Mario Vittorio Mariño, Rosanna Vergara, Ray Reyes, Ricardo Kho, Neptali Gonzales II, Ambrosio Cruz, Jr., Alfelito Bascug, Sergio Dagooc, Leody Tarriela, Peter John Calderon, Ramon Rodrigo Gutierrez, Jose Maria Zubiri, Jr., Wilter Palma, Ruth Mariano-Hernandez, Oscar Malapitan, Romulo Peña, Jr., Gloria Macapagal-Arroyo, Jose Alvarez, Maria Angela Garcia, Stella Luz Quimbo, at Florida Robes.