SINABI ni PNP Chief General Nicolas D. Torre nitong Lunes sa Journal Group na nais niyang tiyakin na ang lahat ng sangay ng Philippine National Police na may kinalaman sa trapiko ay maglabas ng Traffic Investigation Reports sa tamang oras at walang pagkaantala. Bahagi ito ng kanyang mga bagong direktiba upang tugunan ang kakulangan ng tiwala ng publiko sa institusyon.

Ayon kay Gen. Torre, ang mga opisyal at imbestigador ng pulisya na mapapatunayang dahilan ng pagkaantala sa paglalabas ng mga ulat — na mahalaga sa mga kasong hinahawakan ng korte at sa pagproseso ng insurance claims — ay mahaharap sa mga parusa.

Sa loob ng maraming taon, isa sa mga pangunahing reklamo ng mga motorista na nasasangkot sa aksidente ay ang mabagal na paglalabas ng nasabing ulat, kung saan may ilan pang nagsasabi na kinakailangan pa raw ng “grease money” bago makuha ang dokumento.

Isa pa sa mga reklamo ay ang kakulangan ng “backer” o koneksyon, kaya’t nahihirapang makakuha agad ng dokumento ang mga biktima na kailangang magsampa ng kasong sibil o maghain ng claim sa insurance.

Isa rin sa mga problema ang kakulangan ng mga traffic investigator. Sa ilang kaso, naiulat na tumatagal ng 4 hanggang 8 oras ang paghihintay ng mga may-ari ng sasakyang nasangkot sa aksidente sa mga himpilan ng trapiko. May mga pagkakataon din na kinabukasan pa dumarating ang imbestigador.

Ayon sa isang pag-aaral, makatuwiran ang mga reklamo ukol sa pagkaantala ng mga ulat sa imbestigasyon sa trapiko at ito’y may masamang epekto sa bisa ng sistemang pangkatarungan. Dahil dito, nadedelay ang resolusyon ng mga kaso at naaapektuhan ang karapatan ng mga taong sangkot sa aksidente.

Ayon pa sa pag-aaral, ang pagkaantala ay nagdudulot ng kahirapan sa mga korte sa paggawa ng tamang desisyon batay sa ebidensya — at maaaring makaapekto ito sa katarungan at patas na proseso.

Panghuli, lumilikha rin ang pagkaantala ng impresyon ng kawalan ng kahusayan sa hanay ng pulisya at nagiging ugat ng mga isyu ng korapsyon sa mata ng mga mamamayang hindi agad natutugunan ang kanilang mga problema.