KINUMPIRMA ng Commission on Appointments (CA) nitong Miyerkules ang pagtatalaga kay Ma. Theresa Parreño Lazaro bilang Kalihim ng Kagawaran ng Ugnayang Panlabas (DFA), kasabay ng pagkakakumpirma rin sa 59 na iba pang opisyal ng serbisyong panlabas.

Nagpasa ng plenaryong botohan ang CA, ilang oras matapos iendorso ng Committee on Foreign Affairs ang kumpirmasyon ni Lazaro at ng iba pang diplomats.

Ipinahayag ni Senador Jinggoy Ejercito Estrada, na nagsilbing sponsor ng nominasyon ni Lazaro, ang kanyang papuri sa matagal nang paglilingkod nito sa DFA. “Secretary-designate Lazaro is a paragon of excellence in the Philippine Foreign Service. Her remarkable career, spanning over four decades since she joined the Department of Foreign Affairs in 1984, reflects an unwavering dedication to the service of our country,” aniya.

Bago ang botohan, naging maayos at mabilis ang pagdinig ng komite kung saan kinilala ang dating mga tungkulin ni Lazaro bilang embahador sa Switzerland, France, at UNESCO. Nagsilbi rin siya bilang undersecretary ng DFA na namahala sa bilateral relations at mga usaping may kinalaman sa ASEAN.

Ipinunto ni Estrada ang mahalagang kontribusyon ni Lazaro sa mga isyung pandagat. “Among her notable contributions was her pivotal role in managing tensions in the West Philippine Sea, including facilitating arrangements to ensure the continued resupply of Philippine personnel stationed at Ayungin Shoal,” aniya.

Dagdag pa niya, magiging susi ang pamumuno ni Lazaro sa nalalapit na ASEAN Chairmanship ng Pilipinas sa 2026. “Her tenure… was marked by strategic leadership in regional diplomacy… and contributed meaningfully to preparations for our assumption of the ASEAN Chairmanship in 2026,” ayon sa senador.

Ang mga iba pang Kinumpirma ng Makapangyarihan CA ay ang mga sumusunod na kasabay ng kumpirmasyon kay Lazaro, inaprubahan din ng CA ang mga sumusunod:

🔷 Mga Chiefs of Mission

Maria Teresa Torres Almojuela – Germany

Arvin Reyes de Leon – United States (may hurisdiksyon sa Central America at Caribbean)

Alan Lazaro Deniega – Poland (saklaw rin ang Lithuania at Ukraine)

Bernadette Therese Chiu Fernandez – Korea

Evangeline T. Ong Jimenez-Ducrocq – ASEAN (Jakarta)

Roberto Gutierrez Manalo – Central Asia at Iran

Marie Charlotte Golim Tang – Ethiopia, Kenya, at iba pang bansa sa Africa

🔷 Ad Interim Appointments

Mga Chiefs of Mission (Class I at II) tulad nina Marshall Louis Macabale Alferes, Mary Anne Padua, at Crystal Dunuan

Mga Career Ministers gaya nina Gilbert Segarra, Bolivar Bao, at Jose Luzanta Garcia III

Mga Foreign Service Officers (Class I at II) kabilang sina Angela Elepaño Tolentino, Diane Shayne Lipana, at Sharon Yap

Nagpalabas ng waiver ang komite para sa personal na pagdalo at publikasyon ng mga abiso, kaya’t pinayagan ang ilang diplomats na lumahok sa pamamagitan ng remote setup.

Binigyang-diin ni Estrada sa kanyang pagtatapos: “Ms. Ma. Theresa Lazaro has proven herself worthy of this critical role. She possesses the gravitas, wisdom, and commitment that the post demands.”

Sa kumpirmasyong ito, ganap nang naitalaga ang mga pangunahing lider ng DFA at mga kinatawan sa ibayong-dagat, na nagpapalakas sa ugnayang panlabas ng bansa sa gitna ng pabagu-bagong pandaigdigang kalagayan.