KUMPIRMADONG tinanggap ng Senado bago mag alas 6:00 ng gabi kung saan sila ang tumatayong hukuman ng impeachment bilang korte, ang opisyal na tugon ni Pangalawang Pangulo Sara Duterte sa writ of summons nitong Lunes ng gabi—ilang oras bago ang itinakdang pinal na oras na hangang 11:59 ng gabi, na hindi na umano maaaring palawigin pa.

Sa pagsusumiteng ito, nakasunod si Duterte at ang Fortun, Narvasa and Salazar Law firm, sa mga regulasyon ng impeachment court at napanatili ang kanyang karapatang pormal na tumugon sa mga artikulo ng impeachment na ipinadala ng House of Representatives.

Kabilang sa mga akusasyon laban sa kanya ang umano’y maling paggamit ng confidential at intelligence funds, gayundin ang posibleng paglabag sa Konstitusyon kaugnay ng kanyang sabayang tungkulin bilang Kalihim ng Edukasyon.

Ayon sa mga ulat, mas maaga ring inihain ng kampo ni Duterte ang parehong tugon ad cautelam sa Kamara, ngunit nahuli ang paghahatid nito sa Senado dahil sa mga aberya sa trapiko at lagay ng panahon. Sa kabila nito, kinilala na ng Senado ang nasabing dokumento at itinala ito bilang bahagi ng mga pormal na proseso ng paglilitis.

Ang paghahain ng tugon ad cautelam — isang legal na hakbang upang mapanatili ang mga karapatan habang kinikwestyon ang ilang aspeto ng proseso — ay maaaring senyales na balak ng kampo ni Duterte na hamunin ang ilang usaping procedural nang hindi kinikilala agad ang hurisdiksiyon ng hukuman.

Ngayong naisumite na ang sagot, inaasahang uusad na ang mga susunod na yugto ng paglilitis, kabilang na ang pagsagot ng prosecution panel ng Kamara, ang pagharap ng Pangalawang Pangulo sa hukuman, ang kanyang plea, at ang mga paunang pagdinig.

Binanggit ng mga eksperto sa batas na kung nabigo si Duterte na magsumite ng tugon, maaaring mawala sa kanya ang karapatang maghain ng nakasulat na sagot—bagamat magpapatuloy pa rin ang paglilitis.

Sa kasalukuyan, wala pang inilalabas na detalye tungkol sa nilalaman ng kanyang sagot. Wala ring opisyal na pahayag mula sa Senado o sa Office of the Vice President.