HALOS lahat ng mga party-list representatives ngayong 20th Congress ay sumusuporta sa patuloy na pagiging Speaker ni Leyte 1st District Rep. Martin Romualdez.

Sa isang panayam, sinabi ni Ako Bicol Party-list Rep. Alfredo Garbin Jr. na nasa 57 o 58 sa 63 party-list representatives ang sumusuporta kay Romualdez.

“We are certain that the super majority of the incoming 20th Congress supports Speaker Martin Romualdez… And all major political parties–including ours, the party-list coalition–I think 57 or 58 of us are supportive of Speaker Martin Romualdez,” ani Garbin.

“During the oath-taking pa lang ng proclamation ng mga members of 20th Congress, nakita ko ‘yung malakas na suporta talaga kay Speaker Martin Romualdez,” dagdag pa nito.

Sa Hulyo 28, ilang oras bago ang State of the Nation Address ni Pangulong Ferdinand Marcos Jr. ay magkakaroon ng botohan sa pagka-Speaker sa Kamara.

Ayon kay Garbin, sa 317 miyembro ng Kamara sa 20th Congress, 287 na ang nagpahayag ng suporta kay Romualdez. Sa bilang na ito, 283 ang pisikal nang lumagda sa isang manifesto of support.

Si Romualdez ay presidente ng partidong Lakas-Christian Muslim Democrats (Lakas-CMD), ang pinakamalaking partido sa Kongreso ngayon.