INIHAYAG ni PNP Aviation Security Group (ASG) Director, Brigadier General Jason L. Capoy nitong Huwebes na iniutos na niya sa kanyang mga tauhan ang malawakang operasyon laban sa mga abusadong public utility vehicle (PUV) drivers, partikular na yaong naniningil nang sobra sa mga pasahero sa lahat ng paliparan sa bansa.

Ayon kay Gen. Capoy, ito ay alinsunod sa direktiba ni PNP Chief Gen. Nicolas D. Torre III, at layuning mahuli ang mga taxi at ‘habal-habal’ driver na kilala sa sobrang paniningil at pananakot sa mga pasahero.

Oplan: Bandillo Ipinatutupad Araw-Araw

Ang lahat ng PNP-ASG Regional Units ay kasalukuyang nagpapatupad ng Oplan: Bandillo, kung saan umiikot ang mga pulis gamit ang megaphone upang hikayatin ang publiko na i-report ang mga drayber na naniningil nang labis. Pinapaalalahanan din ang publiko na huwag magdala ng mga ipinagbabawal gaya ng baril, droga, at pampasabog sa paliparan.

Ang anunsyong ito ay regular na inuulit sa mga pangunahing paliparan tulad ng:

NAIA Terminals 1, 2, at 3

Mactan-Cebu International Airport

Clark International Airport

Davao, Kalibo, Laoag, at Puerto Princesa International Airports

Ganito rin ang ginagawa ng mga Aviation Security Unit sa Tacloban (Region 8), Laguindingan (Region 10), Cauayan, Isabela (Region 2), at Bacolod (Negros Island Region).

Kasama ang LTO, LTFRB sa Operasyon

Simula noong nakaraang linggo, higit isang dosenang taxi at ‘habal-habal’ drivers ang nahuli sa paligid ng NAIA sa pakikipagtulungan ng LTO at LTFRB, bunsod ng isang viral na insidente kung saan isang taxi driver ang naningil ng P1,260 mula NAIA Terminal 3 papuntang Terminal 2 (na 8.4 kilometro lang ang layo).

Noong Hunyo 25, 11 PUV drivers ang na-intercept sa NAIA dahil sa ilegal na pagkontrata at paglabag sa prangkisa, na sakop ng Joint Administrative Order (JAO) 2014-01. Ang parusa sa unang paglabag ay P5,000.

Noong Hunyo 27–28, nahuli rin ang 8 habal-habal at 2 taxi dahil sa parehong paglabag. Katulad na operasyon ang isinagawa sa Catarman, Davao City, General Santos, at Lapu-Lapu City.

Mahigit 60 Drivers Nahuli

Aabot sa 46 taxi drivers, 7 UV Express drivers, at 11 habal-habal drivers ang nahuli mula nang simulan ang crackdown. Sa ngayon, ang mga driver at ang kanilang mga operator ay sumasailalim sa im-bestigasyon at penalidad.

Imbestigasyon Laban sa Airport Police

Iniutos ni DOTr Secretary Vince Dizon ang pag-relieve sa limang miyembro ng Airport Police Department na iniimbestigahan dahil sa umano’y pakikipagsabwatan sa mga abusadong driver kapalit ng bahagi ng kita.

Ayon sa isang nahuling driver, pinipilit umano silang ibigay ang 40% ng kanilang kita sa airport police kapalit ng “madaling access” sa NAIA. Ang mga tumatangging sumunod ay hinuhuli o pinipigilang makapasok sa paliparan.

“Ang insidenteng ito ay dapat magsilbing babala. Hindi ito matatapos dito—ito ay simula pa lamang ng sunod-sunod na aksyon upang linisin ang ating mga paliparan mula sa ganitong mga pang-aabuso,” pahayag ni Gen. Capoy.

Panawagan sa Publiko

Nanawagan si Sec. Dizon sa publiko na patuloy na i-report ang mga abusadong driver at, kung maaari, gumamit ng transport network vehicle services (TNVS) o ride-hailing apps para masigurong patas ang bayad at ligtas ang biyahe.