KINUMPIRMA ng Civil Aviation Authority of the Philippines (CAAP) na ligtas na nakabalik sa Ninoy Aquino International Airport (NAIA) ang Saudia flight na patungong Jeddah noong Huwebes matapos makaranas ng teknikal na problema.

Dakong alas-12:51 ng hatinggabi nakatanggap ang CAAP Operations Center ng ulat mula sa Manila Area Control Center na ang Flight SVA 871 ay bumabalik sa Maynila.

Matagumpay itong nakalapag sa NAIA bandang ala-1:25 ng madaling araw.

Nakikipag-ugnayan ang CAAP sa airline at mga kaugnay na ahensiya upang matiyak ang kaligtasan ng publiko at ang tuloy-tuloy na kahandaan sa mga operasyong panghimpapawid.