“ANG sugal ay salot!”

Ito ang paninindigan ni Manila 2nd District Congressman Rolando “CRV” M. Valeriano patungkol sa perwisyong idinudulot ng lahat ng klase ng sugal kabilang na ang e-sabong para sa mga taong nalululong dito at nauubos ang kanilang kabuhayan.

Dahil dito, inihain ni Valeriano ngayong 20th Congress ang kaniyang panukalang batas na naglalayong ipagbawal o i-ban ang e-sabong kasama na ang mga kahalintulad nitong sugal.

Sa ilalim ng House Bill No. 1455 na isinulong ni Valeriano, mahigpit na ipagbabawal ang live-streaming, broadcasting, placing, receiving, transmitting at processing ng mga taya para sa sabong kasabay ng pagbabawal sa operation ng E-Sabong betting platform.

Sinabi ng kongresista na pumasa sa ikatlong pagbasa sa nakalipas na 19th Congress ang panukalang batas na nagbabawal sa e-sabong subalit sa kasamaang palad aniya ay wala naman itong counterpart na panukala sa Senado.

Binigyang diin ni Valeriano na isa sa mga pinaka-matinding epekto ng salot na sugal sa ating bansa ay ang mga karumal-dumal na krimen at walang habas na pagpatay na kinasasangkutan ng ilang tiwaling opisyal ng Philippine National Police (PNP).

“Sa karumal-dumal na krimen pa lang na hanggang ngayonay nananatiling unresolved. Alam naman na nating kailangang permanenteng tuldukan na ang e-sabong. Baka magpalit na lamang ng administrasyon bumalik na ang salot na ito,” wika nito.

Nakasaad din sa panukalang batas ni Valeriano na hindi lamang ang e-sabong ang ipagbabawal. Bagkos, isinasama na dito ang lahat ng online gambling gaya ng karera ng kabayo, dog racing, sa pula sa puti, online casino at sports betting.