MAHIGIT sa 15,000 security personnel umano ang ipakakalat sa inagurasyon ni President-elect Ferdinand “Bongbong” Marcos Jr. sa Hunyo 30.

Makakatuwang umano ng mga pulis sa pagbabantay ang sundalo, Coast Guard personnel at iba pang force multiplier, ayon sa Philippine National Police (PNP).

Bubuhayin rin umano ang Task Force Manila Shield dalawang araw bago ang inagurasyon na gagawin sa National Museum sa Ermita, Manila.

Mayroon ding mga itatayong mga checkpoint at chokepoint sa mga daan papunta sa Maynila tatlong araw bago ang panunumpa ng ika-17 Pangulo ng Republika.

Ipagbabawal din ang rally malapit sa lugar ng inagurasyon at magtatalaga ng mga freedom park na maaaring magamit ng mga magsasagawa ng kilos protesta.