CAMP OLIVAS, City of San Fernando, Pampanga — Iniulat ng Police Regional Office 3 (PRO3) ang panibagong malaking tagumpay sa kampanya laban sa ilegal na droga matapos ang pag-aresto sa dalawang high-value individuals (HVTs) at pagkakasamsam ng mahigit P3.25 milyon halaga ng shabu sa magkahiwalay na operasyon sa Olongapo City.

Inaresto ng mga operatiba ng City Police Drug Enforcement Unit (CPDEU), sa koordinasyon ng Criminal Investigation Unit (CIU) ng Olongapo City Police, Regional Intelligence Division (RID) ng PRO3, at Police Station 1, ang isang suspek na kilala sa alyas na “Bash” sa isang buy-bust operation sa Barangay West Bajac-bajac.

Narekober mula sa suspek ang anim na pakete ng plastik na naglalaman ng humigit-kumulang 400 gramo ng hinihinalang shabu na nagkakahalaga ng hindi bababa sa P2.72 milyon, kasama ang marked at boodle money.

Sa hiwalay na operasyon, inaresto ng pinagsanib na puwersa ng CPDEU, CIU-OCPO, at RID-PRO3 ang isa pang high-value individual na kinilalang “Kevin” sa Barangay Sta. Rita.

Nasamsam mula sa kanya ang 78 gramo ng hinihinalang shabu na nagkakahalaga ng P530,400, gayundin ang buy-bust money.

Ayon kay PRO3 Director Brig. Gen. Ponce Rogelio I. Peñones Jr., pinatutunayan ng matagumpay na mga operasyon ang tuluy-tuloy at intelligence-driven na kampanya ng rehiyon laban sa ilegal na droga.

“Ang mga tagumpay na ito ay nagpapakita ng matibay na paninindigan ng ating mga yunit ng pulisya na magsagawa ng mga nakatuon, makatarungan, at koordinadong operasyon. Naninindigan kami na pigilan ang ilegal na droga sa pagsira ng buhay at komunidad, habang tinitiyak na ang lahat ng aksyon ng pulisya ay mahigpit na sumusunod sa due process at propesyonalismo,” ani Peñones.

Sinusuportahan din ng mga pag-aresto ang focused agenda ng Philippine National Police sa ilalim ni Acting PNP Chief Lt. Gen. Jose Melencio C. Nartatez Jr., partikular sa pagpapalakas ng operasyon ng pulisya at sa pagpapatibay ng kaligtasan ng komunidad sa pamamagitan ng disiplinado at may pananagutang pagpapatupad ng batas.