INANUNSYO ni Brigadier General Wilson P. Asueta, direktor ng Philippine National Police Anti-Cybercrime Group (PNP-ACG), ang pagkaka-aresto sa isang pekeng ‘Sabah King’ at 14 nitong kasamahan na akusado sa partisipasyon sa isang multimilyon-pesong online investment scam sa bansa.

Ayon sa opisyal, ang akusado na nag-aangking direktang inapo ng isa sa pinakamayayamang tao sa Mindanao ay pinaniniwalaang nakapanloko ng libu-libong Pilipino hanggang sa sila ay nahuli sa isang entrapment operation sa Sta. Rosa City, Laguna.

Sinabi ni Brig. Gen. Asueta na ang 15 akusado ay hinihikayat ang mga tao na sumali sa isang hindi rehistradong online investment scheme sa pamamagitan ng recruitment ng miyembro, na may pangakong pinansyal na kita sa hinaharap at umano’y panghabambuhay na benepisyo.

Nag-ugat ang operasyon ng PNP-ACG sa impormasyong intelihensiya na natanggap ng yunit noong Disyembre tungkol sa isang organisadong grupo na sangkot sa online scam. Batay sa ulat, nagsagawa ang mga cybercop ng cyber patrol upang mapatunayan ang impormasyon at suportahan ang karagdagang imbestigasyon.

Natuklasan nila na aktibong ginagamit ng grupo ang iba’t ibang online platform para manghikayat ng miyembro sa pamamagitan ng alok na tinatawag na “Yellow Cards” at “Green Cards,” na nagkakahalaga mula P150 hanggang P5,500. Hinikayat ang mga biktima na mag-invest ng pera sa pag-asang makakakuha ng pinansyal na kita sa hinaharap.

Sinusuportahan din ang operasyon ng reklamo mula sa Securities and Exchange Commission (SEC) kasunod ng ulat na maraming biktima, kabilang ang matatanda at miyembro ng mga Katutubong Komunidad, ang naloko at naniwala na makakatanggap sila ng bahagi ng umano’y nakatagong yaman na ibibigay sa “Supremo.”

Iniuulat na tinukoy ng “Supremo” ang sarili bilang “Spiritual Wonder Boy” at ang “Hari” ng tinaguriang Royal Kingdom of Maharlika (Pearl of the Orient) at Royal Vanguard Transnational Intelligence Inc.

Inangkin niyang ipapamahagi sa bawat miyembro ang P5 milyon at dalawang porsyentong bahagi mula sa diumano’y koleksyon ng 174 na bansa na utang umano sa Pilipinas.

Sa isang livestreamed na talumpati noong Marso 28, iginiit ng suspek na siya ang nag-iisang tagapagmana ng kayamanan ng pamilya Kiram sa Mindanao—na diumano’y kaugnay ng mga nasabing ari-arian.

Ang pamilya Kiram, na tagapagmana ng dating Sultanato ng Sulu, ay inaangkin ang pagmamay-ari ng Sabah, Malaysia base sa kasunduan noong 1878 na nagpapaupa sa teritoryo sa isang British company, at humihingi ng bilyon-bilyong kompensasyon mula sa pamahalaan ng Malaysia.

Sinabi ng opisyal na pinangunahan ng PNP-ACG, sa suporta ng Police Regional Office 4-A at mga kinatawan mula sa SEC, ang sting operation na nagresulta sa pagkaka-aresto ng 15 katao kasama ang 60-taong gulang na umano’y mastermind na may alyas na ‘Supremo’ noong Marso 28.

Ayon kay Brig. Gen. Asueta, ipinangako ng tinaguriang ‘Supremo’ sa kanyang mga miyembro na yayaman sila kapag opisyal na siyang itinalagang may-ari ng Pilipinas at natanggap ang bayad ng utang mula sa 174 na bansa.

“Marami ang naniwala sa suspek na mahusay magsalita, karamihan ay miyembro ng mga katutubong tribo at matatanda mula Luzon, Visayas, at Mindanao, na tunay na nagtiwala sa kanyang pahayag na siya ay magiging may-ari ng bansa,” ani niya.

Ipinapakita ng mga ulat na ang mga biktima mula Luzon, Visayas, at Mindanao ay naloko ng mga pahayag na ito at patuloy na naniniwala na makakatanggap sila ng ipinangakong benepisyo.

Ang mga naarestong indibidwal ay kasalukuyang nahaharap sa kaso para sa paglabag sa Sections 8.1, 26.3, at 28 ng Republic Act No. 8799 o Securities Regulation Code kaugnay ng Section 6 ng RA No. 10175 o Cybercrime Prevention Act of 2012.

Pinuri ni PNP chief, General Jose Melencio C. Nartatez Jr., ang PNP-ACG sa kanilang kamakailang tagumpay habang binibigyang-diin ang kahalagahan ng pagbabantay at mas mataas na kamalayan, lalo na sa mga komunidad sa kanayunan.

Inutusan din niya ang PNP-ACG na palakasin ang kampanya para sa kamalayan ng publiko at istriktong ipatupad ang mga batas laban sa cybercrime.

“Hayaan itong magsilbing paalala na ang mga kriminal na gawain sa digital platforms ay hindi nakalalayo sa abot ng katarungan. Sisiguraduhin naming pananagutin ang lahat ng lumalabag,” sabi ni Brig. Gen. Asueta.