TATLO ang iniulat na nasawi, kabilang ang mag-asawang senior citizen, habang pito ang nasugatan sa sunog na sumiklab Miyerkules ng hapon sa Taguig City.

Nagsimula ang sunog pasado alas-4 ng hapon sa C6 Road, Barangay Lower Bicutan na itinaas lamang sa unang alarma bago naapula alas-6:30 ng gabi.

Kabilang sa nasawi matapos ma-trap sa nasusunog nilang tirahan ang 67-anyos na lolo at 65-anyos niyang misis, pati na ang isang batang lalaki na hindi pa batid ang pagkakakilanlan.

Nagtamo naman ng mga minor injuries ang pito pang indibiduwal matapos tangkain nilang isalba ang kanilang mga gamit.

Wala pang inisyal na ulat na inilalabas ang Taguig Bureau of Fire Protection kung ano ang pinagmulan ng sunog at magkano ang halaga ng mga naabong ari-arian.