SOLID ang 11 miyembro ng minority sa Senado na handang tumulong na maibalik ang tiwala ng publiko sa kapulungan, ayon kay Sen. Risa Hontiveros.

Nais ng minority na mag-ambag sa mga pagsisikap na maibalik ang tiwala sa institusyon, kabilang ang pagharap ng Senado sa impeachment process at sa mga tanong na dulot ng mga kamakailang pangyayari, pahayag ni Hontiveros.

May mga pag-uusap tungkol sa posibleng pagbabago sa mga alyansa sa Senado, ngunit binigyang-diin niyang ang tanging kumpirmadong bilang sa ngayon ay ang 11 miyembro ng minority.

Sinabi ni Hontiveros na kailangan ng minority ng hindi bababa sa dalawa pang senador upang maabot ang 13 boto para sa simple majority.

Nang tanungin tungkol sa pananagutan sa pagkawala ng tiwala ng publiko sa Senado, sinabi ni Hontiveros na may pananagutan ang lahat ng senador dahil hindi nakasalalay sa isang miyembro lamang ang institusyon.

“Of course, in principle, collectively lahat po kami ay dapat managot. Kasi di naman iisang senador ang buong Senado. Lahat kami ang Senado,” sinabi niya.

Dapat hayaan ng mga senador ang kumpleto at maayos na imbestigasyon sa mga kamakailang pangyayari sa Senado upang maiulat sa publiko ang findings at magamit itong batayan ng mga reporma o iba pang nararapat na hakbang.

Ayon sa kanya, dapat maging batayan ang resulta ng imbestigasyon para sa anumang rekomendasyong maaaring umangkop sa mga senador at sa institusyon.

“And on the basis ng findings na iyon ay bigyang daan namin at sundin na applicable sa amin na mga rekomendasyon ng pagwawasto. Anuman iyon,” sinabi ni Hontiveros.

Ang ethics complaint ay nananatiling isa sa pinakamalakas na disciplinary mechanism sa Senado kung ito ay umuusad, sabi ng senador.

Ayon kay Hontiveros, kikilos ang minority upang tumulong sa pagsagot sa mga tanong ng publiko, makipagtulungan sa mga imbestigasyon at mag-ambag sa pagpapanumbalik ng tiwala sa Senado.