MARIING itinanggi noong Lunes ni House lead prosecutor at Chair ng Committee on Justice na si Gerville “Jinky Bitrics” Luistro ng Batangas ang mga pahayag na iniuugnay ang impeachment proceedings laban kay Pangalawang Pangulo Sara Z. Duterte sa umano’y mga pagtatangkang itulak ang isang sitwasyong walang eleksiyon o “no-election scenario.”

Tinawag niya ang mga ito na isang “diversionary tactic” o taktikang panglihis at iginiit na nananatiling nakatuon ang Kamara sa paggawa ng batas at pagtupad sa mga tungkuling itinakda ng Konstitusyon.

Bilang tugon sa mga pahayag na iniugnay kay Senadora Imee Marcos, sinabi ni Luistro na wala umanong naging talakayan sa Kapulungan ng mga Kinatawan hinggil sa anumang no-election scenario.

“Ang mga pahayag ni Senator Imee, hindi ko alam kung saan niya nakuha iyon. Ngunit sa abot ng aking nalalaman, dahil sarili ko lamang ang maaari kong pagsalitaan, wala pong anumang ganitong talakayan dito sa House of Representatives,” ani Luistro sa isang press briefing.

Nauna nang inaprubahan ng Kamara ang impeachment laban kay Duterte at ipinadala ang mga Artikulo ng Impeachment sa Senado, na nakapagpulong na bilang impeachment court.

Ayon kay Luistro, nananatiling nakatuon ang Kamara sa pagtupad sa mga tungkuling ipinagkaloob dito ng Konstitusyon, habang ang Senado naman ang may pananagutang magsagawa ng paglilitis at maglabas ng pasya.

“Ang tungkuling konstitusyonal ng Kamara ay iharap ang ebidensiya. Ang pagpapasya sa kasong impeachment na ito ay nakasalalay sa mga senador na magsisilbing hukom,” paliwanag niya.

“Maging ang pagsasagawa ng paglilitis ay isang tungkuling nakatalaga sa Senado,” dagdag pa niya.

Muling tiniyak ni Luistro na handa ang panel ng prosekusyon na humarap sa impeachment court sa sandaling umusad na ang mga pagdinig.

“Kaya inuulit ko, handa ang 11 prosecutors na humarap. Kailanman ito magsimula, umaasa kaming mangyari ito sa lalong madaling panahon,” aniya.

Sinabi rin ni Luistro na natapos na ng Kamara ang bahagi nito sa proseso ng impeachment at nakahanda itong ipagpatuloy ang pagtupad sa mga tungkuling konstitusyonal nito habang nagpapatuloy ang paglilitis.

“Sa katunayan, natapos na namin ang proseso dito sa House of Representatives,” sabi niya.

Dagdag pa niya:“Sa panig ng Kamara, mahigpit naming sinusunod ang aming konstitusyonal na mandato. At balak naming ipagpatuloy ang pagtupad dito kahit sa panahon ng paglilitis.”

Ipinahayag din ni Luistro ang pag-asang matutuloy ang mga iskedyul na iniulat para sa impeachment proceedings.

“At inaasahan namin na sana ang mga petsang lumalabas sa media—ang pre-trial conference sa Hunyo 15 at ang unang iskedyul ng paglilitis sa Hulyo 6—ay matuloy na, dahil ito ang itinatadhana ng ating konstitusyonal na mandato,” ani Luistro.

Paulit-ulit nang iginiit ng prosecution panel na ang mga kasong impeachment ay dapat umusad alinsunod sa Konstitusyon at na natupad na ng Kamara ang tungkulin nito sa pamamagitan ng pag-apruba at pagpapadala ng mga Artikulo ng Impeachment sa Senado.