Malugod na tinanggap noong Lunes ni House lead prosecutor at Chair ng Committee on Justice na si Gerville “Jinky Bitrics” Luistro ang pinakabagong survey ng OCTA Research na nagpapakitang malaking mayorya ng mga Pilipino ang sumusuporta sa pagpapatuloy ng impeachment trial laban kay Pangalawang Pangulo Sara Z. Duterte. Ayon kay Luistro, pinatutunayan ng resulta ng survey ang paniniwala ng prosecution panel na nais ng publiko ang pananagutan ng mga opisyal ng gobyerno.

Ayon sa pinakahuling Tugon ng Masa Survey, 74 porsiyento ng mga nasa hustong gulang na Pilipino ang sumusuporta sa pagpapatuloy ng Senado sa impeachment trial anuman ang maging resulta nito. Tanging 21 porsiyento lamang ang tutol, habang 4 porsiyento ang hindi pa nakapagpasya.

“Well, we welcome that survey, it only validates what we believe is the demand of the Filipino people now,” ani Luistro sa isang press conference.

Nauna nang inaprubahan ng Kamara ang impeachment laban kay Duterte at ipinadala ang mga Artikulo ng Impeachment sa Senado, na nakapagtipon na bilang impeachment court.

Sinabi ni Luistro na ipinapakita ng resulta ng survey ang hangarin ng publiko na umusad ang prosesong itinakda ng Konstitusyon at matalakay ang mga alegasyon laban sa Pangalawang Pangulo sa tamang forum.

“At nakikita naman natin iyon sa mga nangyayari sa paligid na ang gusto talaga ng taumbayan ay magtuloy-tuloy itong impeachment trial,” aniya.

“At ito ang layunin ng mekanismo ng pananagutan o accountability.”

Ipinakita rin ng survey ng OCTA na mataas ang suporta sa paglilitis sa lahat ng pangunahing rehiyon ng bansa. Pinakamataas ito sa Visayas na may 82 porsiyento, sinundan ng National Capital Region (NCR) na may 81 porsiyento, at Balance Luzon na may 77 porsiyento.

Pinakamababa naman ang suporta sa Mindanao na may 58 porsiyento, bagaman mayorya pa rin doon ang pabor sa pagpapatuloy ng paglilitis.

Ayon kay Luistro, lalo lamang pinagtibay ng mga resulta ang paniniwala ng prosecution panel na nais ng mga Pilipino na magpatuloy ang impeachment alinsunod sa Konstitusyon.

“Kaya masaya kami at tinatanggap namin ang survey na nagpapakitang 74 porsiyento ang pabor sa pagsasagawa ng impeachment trial,” aniya.

Sa mga Artikulo ng Impeachment, inaakusahan si Duterte ng maling paggamit ng confidential funds, hindi maipaliwanag na yaman, panunuhol, at pagbabanta laban kina Pangulong Ferdinand R. Marcos Jr., Unang Ginang Liza Araneta-Marcos, at dating Speaker Ferdinand Martin G. Romualdez.

Paulit-ulit na iginiit ng prosecution panel na ang impeachment ay isang mekanismong itinakda ng Konstitusyon upang tiyakin ang transparency at pananagutan sa pamahalaan, at na dapat ituloy ng Senado, bilang impeachment court, ang paglilitis ayon sa itinatadhana ng Saligang Batas.

Ipinahayag din ng mga House prosecutor ang kanilang kahandaan para sa susunod na yugto ng proseso at naghihintay na lamang ng opisyal na abiso mula sa Senate impeachment court hinggil sa mga pre-trial proceedings at sa pagsisimula ng paglilitis.