ISINAGAWA ng Office for Transportation Security (OTS) ang isang komprehensibong security audit sa Surigao Airport mula Mayo 18 hanggang 22, 2026 upang suriin ang pagpapatupad ng mga hakbang sa seguridad ng paliparan at matiyak ang pagsunod nito sa pambansa at pandaigdigang pamantayan sa aviation security.

Pinangunahan nina OTS National Aviation Security Auditors Anallie Cruzada at Quinna Lopez ang audit, kung saan nagsagawa sila ng entry briefing kasama ang mga opisyal ng paliparan upang repasuhin ang mga kaugnay na dokumento at suriin ang implementasyon ng mga aprubadong hakbang at pamamaraan sa seguridad.

Kasunod nito, nagsagawa ang audit team ng walkthrough inspections sa mahahalagang lugar ng seguridad kabilang ang access control measures, perimeter security systems, at cargo operations. Isinagawa rin ang mga obserbasyon sa gabi upang masuri ang presensya ng seguridad, mga pamamaraan ng pagmamanman, at pagsunod sa mga OTS-approved security plans at programs ng paliparan.

Bukod pa rito, nagsagawa rin ng mga panayam sa aviation security personnel upang masuri ang kanilang kahandaan sa operasyon at mga response procedures sa paghawak ng mga insidente ng unlawful interference sa loob ng paliparan.

Sa pamamagitan ng tuloy-tuloy na audit at oversight activities, nananatiling nakatuon ang OTS sa pagpapatibay ng aviation security at sa pagtitiyak ng ligtas, maayos, at episyenteng operasyon ng mga paliparan, alinsunod sa direktiba ni Pangulong Ferdinand “Bongbong” Marcos Jr. na palakasin ang mga sistema ng seguridad sa transportasyon ng bansa.