INATASAN ni Sen. Raffy Tulfo ang Civil Aviation Authority of the Philippines (CAAP) na inspeksyunin ang lahat ng airport runways matapos talakayin sa pagdinig ng Senado ang sirang runway surfaces sa Zamboanga at Cauayan airports.

Dapat ituring na aviation safety concern ang mga depekto sa runway dahil may panganib sa eroplano kapag ito ay nagte-takeoff, lumalapag o nagta-taxi, ayon sa senador.

Hindi maaaring ituring na karaniwang sira sa kalsada ang problema sa runway dahil maaaring tumigil ang biyahe ng eroplano kapag na-flat ang gulong pero maaaring mauwi sa seryosong aksidente ang katulad na problema sa eroplano.

Tinalakay ni Tulfo ang isyu matapos banggitin ang mga pangamba sa runway ng Cauayan Airport sa Isabela at mga ulat na mas malala umano ang kondisyon sa Zamboanga City International Airport.

Sinabi ng isang aviation safety representative sa komite na maaaring makapinsala sa eroplano ang sirang runway surfaces at loose materials.

Sinabi ng mga opisyal ng CAAP na ang apektadong bahagi ng runway sa Cauayan ay hindi na ginagamit, habang isinasagawa ang mga corrective measure.

Nang hingan ni Tulfo ng tiyak na petsa, sinabi ng CAAP na inaasahang magsisimula ang trabaho sa asphalt overlay ng runway sa Zamboanga sa July 30.

“July 30 at the most mag-umpisa na yung trabaho na ayusin ang lubak-lubak sa Zamboanga City International Airport,” sabi ni Tulfo.

Tinalakay ang isyu sa runway safety sa parehong pagdinig kung saan pinag-usapan din ng komite ang bird-strike risks, gastos sa airports, reklamo ng mga pasahero sa pantalan, tollway delays at public transport safety sa ilalim ng panukalang Magna Carta of Commuters.