INALIS ng House prosecution ang pitong nakaplanong testigo sa impeachment charge kaugnay ng umano’y mga banta ni Vice President Sara Duterte, kaya si NBI Director Atty. Melvin Matibag na lamang ang huling saksi nito para sa Article IV.

Sinabi ni House lead prosecutor Rep. Gerville “Jinky Bitrics” Luistro sa Senate impeachment court na hindi na ihaharap ng panel sina Atty. Zuleika Lopez at Capt. Belinda Bello, gaya ng nauna nang inanunsyo, at binawi rin nito ang lima pang testigong nakalista sa pre-trial order.

Kabilang sa lima ang isang kinatawan ng Philippine National Police Firearms and Explosives Office, mga mamamahayag na sina Miquel Flores at Bonz Magsambol, Sheriff Abe Andres, isang kapamilya ng umano’y biktima ng pagbabanta at isang hindi pinangalanang psychiatrist.

Ayon kay Luistro, hindi na kailangan ang kanilang testimonya dahil natalakay na sa mga naunang salaysay, admission at ebidensyang naiharap sa court ang mga paksang dapat sana nilang patunayan.

Inaasahang tatalakayin ng kinatawan ng PNP ang umano’y pagmamay-ari ni Duterte ng mga baril at ang kakayahan umano nitong isakatuparan ang mga banta.

Dapat sanang tumestigo sina Flores at Magsambol na naroon sila sa Nov. 23 video conference at narinig ang mga pahayag ni Duterte tungkol kay President Ferdinand Marcos Jr., First Lady Liza Araneta-Marcos at dating Speaker Martin Romualdez.

Sinabi ni Luistro na napatunayan na ng isang NBI witness ang pagiging authentic ng video at kinilala rin kalaunan ng defense ang pagiging tunay ng mga recording.

Inaasahan namang tatalakayin ni Andres ang insidente noong 2011 na kinasangkutan ni Duterte at isang court sheriff. Sinabi ng prosecution na kinilala na sa paglilitis na nangyari ang naturang insidente.

Dapat sanang talakayin ng kapamilya ang epekto at bigat ng umano’y mga banta, habang ang psychiatrist ay inaasahang tatalakay sa state of mind ni Duterte at sa kakayahan umano nitong isagawa ang mga ito.

Ayon kay Luistro, sapat nang natalakay ang mga pangyayaring nakapaligid sa mga pahayag at ang pagkumpirma umano ni Duterte sa mga ito.

Pananaw ito ng prosecution at hindi pa findings ng impeachment court.

“This withdrawal, Your Honor, renders Attorney Melvin Matibag, the NBI Director, as our last witness for Threat,” sinabi ni Luistro.

Nakatakdang tumestigo si Matibag sa Martes, July 21, ayon kay Impeachment Court spokesperson Atty. Regie Tongol.

Sinabi ng prosecution na balak nitong simulan sa Miyerkules, July 22, ang pagharap ng ebidensya para sa Article I na may kinalaman sa confidential funds.

Pinagbigyan ng court ang mga subpoena para kay Marivic Pareja ng House Legislative Archives, Museum and Management Service at sa Land Bank personnel na sina Violeta Constantino at Ninita Camposano.

Inatasan din si Land Bank President and CEO Lynette Ortiz na ilabas ang mga dokumentong hinihingi ng prosecution.

Nagdulot naman ng pagtatalo sa courtroom ang pagpapaliwanag kung ano sana ang patutunayan ng mga testigong hindi na ihaharap.

Iginiit ng defense counsel na dapat limitahan ang ganitong manifestation sa simpleng pag-anunsyo ng withdrawal, nang walang kasamang factual assertions o legal conclusions na hindi masusubok sa cross-examination.

“If the intent is just to say we’re withdrawing, then that’s it,” ayon sa defense.

Kalaunan ay inatasan ng presiding officer ang magkabilang panig na limitahan ang mga susunod na manifestation sa mismong withdrawal ng mga testigo at iwasan ang mahahabang factual o legal conclusions.

Sinuportahan ni Senador Alan Peter Cayetano ang paghihigpit at sinabing maaaring makapagpasok sa court ng mga pahayag na hindi nasubok ang pagsasalaysay sa testimonyang hindi naman ihaharap.

Sinuportahan din ni Senadora Pia Cayetano ang ruling at sinabing dapat kunin ng mga abogado ang mga obserbasyon mula sa mga testigo sa halip na sila mismo ang magsalaysay ng umano’y nakita o naranasan ng mga ito.

Sinabi naman ni Senador Francis “Kiko” Pangilinan na una niyang pinaboran ang pagbibigay sa defense ng kaparehong pagkakataong magpaliwanag sa mga testigong babawiin nito dahil hindi mahigpit na nakatali sa technical rules of evidence ang impeachment court, ngunit sumunod siya sa ruling ng chair.

Ayon kay Tongol, maaaring mapabilis ng binawasang witness list ang pagtalakay sa Article IV, na unang binigyan ng 11 trial days batay sa 10 nakaplanong testigo.

Tatapusin muna ng prosecution ang pagharap ng ebidensya para sa lahat ng articles bago simulan ng defense ang evidence-in-chief nito.