SINABI ni Sen. Erwin Tulfo na target maipadala kay Pangulong Ferdinand “Bongbong” Marcos Jr. sa Setyembre ang panukalang tumutugon sa system loss charges.

Ibinunyag niya na nagsimulang tumawag sa kanya ang mga kinatawan ng industriya ng kuryente wala pang isang oras matapos simulan ang pagdinig ng Senado.

Maaaring magsagawa pa ang panel ng isang pagdinig bago ilipat sa technical working group ang mga panukalang pagbabago.

Ayon sa senador, nais ng Malacañang na pabilisin ng Kongreso ang pag-alis sa system loss charges sa electric bill ng mga konsyumer. May mga kaugnay na panukalang isinusulong sa House of Representatives, ayon sa kanya.

Kinuwestiyon ni Tulfo kung bakit mga konsyumer ang kailangang sumagot sa mga pagkalugi ng mga kumpanya ng kuryente.

Binanggit niya ang mga ilegal na koneksiyon, maling metro at sirang linya bilang ilan sa mga sanhi ng nontechnical system losses na ipinapasa sa mga customer.

“No’ng nag-hearing po tayo, wala pang isang oras, nagsitawagan na po sa akin. Ang sagot ko na lang, boss, pasensya na. Gusto po ng Pangulo. ‘Yung Pangulo na lang po kausapin ninyo,” sinabi niya.

Hindi niya tinukoy ang mga tumawag o ang mga kumpanyang kanilang kinakatawan.

Kailangang ipaliwanag sa plenaryo ng mga senador na kokontra sa panukala ang kanilang posisyon.

Ipinaliwanag ni Tulfo ang pagkakaiba ng technical at nontechnical losses.

Inihalintulad niya ang technical loss sa isang bloke ng yelong likas na natutunaw habang dinadala. Ang nontechnical losses naman, aniya, ay maaaring dulot ng mga ilegal na koneksiyon, problema sa metro o kuryenteng nakukuha mula sa mga linya.

Hindi na dapat singilin sa mga konsyumer ang nontechnical losses. Nanawagan din siyang alisin ang value-added tax sa technical system losses.

“Wala namang negosyo na walang losses. Dapat pag nag-negosyo ka, nakahanda ka na magsubi ka ng ilan diyan para sa lugi,” sinabi niya.

Dapat akuin ng mga electricity distributor at generation company ang bahagi ng kanilang mga pagkalugi sa halip na ipasa ang lahat ng gastos sa mga konsyumer, ayon kay Tulfo.

Unang hakbang lamang ang panukala sa system loss sa mas malawak na pagrepaso sa 25-taong Electric Power Industry Reform Act of 2001.

Nais niyang palawakin ang kapangyarihan ng Energy Regulatory Commission upang masuri ang presyo ng kuryente, gastos at tubo ng mga kumpanya.

Iminungkahi rin ni Tulfo na repasuhin kung paano kinukuwenta ang mga singil sa kuryente at kung dapat magtakda ng limitasyon sa pagtaas ng presyo.

“Kailangan po natin manghimasok ang gobyerno, alam ng gobyerno kung magkano ang iyong profit,” sinabi niya.