HINDI BABABA SA 23 kahina-hinalang pangalan—ang ilan ay kahawig ng mga pangalan ng mga personalidad sa publiko at ang iba naman ay tumutukoy sa pagkain—ang lumitaw nitong Martes sa mga piling acknowledgment receipt na isinumite ng Office of the Vice President (OVP) bilang suporta sa mga gastusin mula sa confidential fund noong 2023.

Kinumpirma ng supervising auditor ng Commission on Audit (COA) na si Xylene Mae Del Campo sa harap ng Senate Impeachment Court na ang mga resibong ipinakita ng prosekusyon ay bahagi ng mga dokumentong isinumite ng OVP sa Intelligence and Confidential Funds Audit Office (ICFAO) bilang tugon sa mga obserbasyon sa audit.

“During the evaluation po, I tabulated ang acknowledgment receipts based sa date kung kailan sila na-execute, the expense and the amount po,” patotoo ni Del Campo.

Para sa unang dalawang quarter ng 2023, sinabi ng prosekusyon na saklaw ng mga pagtatala ni Del Campo ang 1,049 acknowledgment receipt—519 para sa unang quarter at 530 para sa ikalawang quarter.

Kabilang sa mga piling resibo ang mga pangalang Pia Piattos-Lim, Ralph Josh Bacon, Anne Ongpauco, Heart Santiago, Feonna Villegas, Beth Revilla, Clarisse Hontiveros, Jose Diokno Jr., Diane Maple Lapid at John A. Lapid Jr.

Ipinapakita ng mga dokumentong iniharap sa korte ang mga sumusunod na gastusin: ₱140,000 kay Piattos-Lim para sa pagbili ng impormasyon, ₱150,000 kay Bacon para sa parehong layunin, ₱250,000 kay Santiago para sa mga suplay at ₱500,000 kay Villegas para sa gastusing inilarawan bilang tulong medikal at pagkain.

Para sa ikatlong quarter, na sumasaklaw mula Hulyo 14 hanggang Setyembre 30, ang mga pangalang iniharap ay Beverly Claire Pampano, Matthew N. Keso, Nova Santos, Salah Casim, Renan Piatos, Xiaome Ocho, Jay Kamote, Miggy Mango, Kokoy Villamin, “Contis, Connor Adrian,” Honeylet Camille Sy, Kristine Applegate Estrada at Denise Tanya Escudero.

Kabilang sa mga kaukulang resibo ang ₱250,000 kay Keso, ₱200,000 kay Kamote, ₱50,000 kay Mango at ₱120,000 kay Escudero. Kabilang sa nakasaad na layunin ng mga ito ang pagbili ng impormasyon o mga suplay at pagbabayad ng mga gantimpala.

Nilinaw ni Del Campo na nagsagawa ang ICFAO ng compliance audit at hindi nito bineripika kung umiiral ang mga pinangalanang tatanggap o kung may kaugnayan sila sa mga personalidad sa publiko na kapareho o kahawig ng pangalan.

“Sa ICFAO po kasi ang ginagawa namin is compliance audit po,” sabi niya. “Tinitingnan po namin kung compliant ba sa Joint Circular at kumpleto at proper ba ’yung mga liquidation documents.”

Ipinaliwanag din ng auditor ang pagkakaiba ng isang pinahihintulutang gastusin at isang transaksyong may wastong dokumentasyon. Tungkol sa pagbili ng impormasyon, sinabi niya: “Yes po, under 4.8.1 po, kasama po ang purchase of information.”

Para naman sa mga suplay, sinabi ni Del Campo na hindi pinatutunayan ng mga acknowledgment receipt kung saan binili ang mga item o kung paano ginamit ang mga ito.

“Yung mga acknowledgment receipts po na purchase of supplies, hiningan ko po ng additional documentation to ascertain po na ipinambili po talaga ito ng supplies,” patotoo niya.

Nagsumite rin ang OVP ng isang certification na may petsang Abril 4, 2024, mula kay Col. Raymund Dante P. Lachica at ng Protective Intelligence Operations Reports bilang suporta sa mga pagbabayad ng gantimpala. Binanggit sa certification ang surveillance at pangangalap ng impormasyon sa 127 lugar noong unang quarter at 111 lugar noong ikalawang quarter.

Sinabi ni Del Campo na nakalista sa mga ulat ang mga aktibidad ng Bise Presidente, mga posibleng banta at mga takdang panahon ng operasyon, ngunit hindi ipinakita ang partikular na resulta na kinakailangan upang bigyang-katwiran ang mga gantimpala.

“Hindi ko po nakita ’yung particular accomplishments po na magwa-warrant sa payment of rewards,” sabi niya.

“Ang nakalagay lang sa certification is a general statement that there were no untoward incidents,” dagdag ni Del Campo. “Pero hindi po ito naging sapat.”

Para sa ikatlong quarter, tinukoy ni Del Campo ang apat na isyung binanggit sa isang Audit Observation Memorandum na may petsang Agosto 8, 2024: kawalan ng dokumentaryong ebidensya ng pagbabayad, ₱35 milyon na gantimpala nang walang patunay ng matagumpay na pangangalap ng impormasyon o surveillance, hindi tinukoy na confidential activities sa physical at financial plan, at isang bahagi ng disbursement voucher na walang lagda sa resibo.

Sa naunang pagdinig ng Senate impeachment court, tumanggi ang abogado ng depensa na tiyakang sabihin kung ang mga kontrobersiyal na pangalang naunang lumitaw, kabilang si Mary Grace Piattos, ay mga tunay na indibidwal o ginamit lamang bilang mga alyas.