INUSISA ng mga senator-judge nitong Miyerkules ang isang testigo ng Commission on Audit tungkol sa safe-house rentals, panahon ng paggamit ng pondo, aliases, supporting records at saklaw ng pagsusuri ng COA sa confidential funds na kinasasangkutan ng Office of the Vice President at Department of Education.

Sa ika-15 araw ng impeachment trial ni Vice President Sara Duterte, sinabi ni COA-ICFAO supervising auditor Xylene Mae del Campo na walang nakasaad na address sa mga rekord na sinuri ng mga auditor para sa 34 safe houses na nirentahan ng OVP noong 2022.

Binanggit ni Senator-judge Raffy Tulfo ang ₱16 milyong rental payments para sa 11 araw at kinuwenta niya itong humigit-kumulang ₱42,780 kada safe house bawat araw.

Nang tanungin kung nakakita na siya ng kaparehong halaga ng safe-house rentals sa ibang ahensya, sinabi ni Del Campo, “Wala po, hindi po ganoon kalaki.”

Sinabi ni Del Campo na walang finding ang COA na excessive o abusive ang halaga. Ayon sa kanya, umasa ang mga auditor sa certification ng special disbursing officer na kinakailangan ang mga gastusin at para sa legal na layunin.

“Pero kung dito po malaki po talaga siya for payment of rental of safe house,” sinabi ni Del Campo.

Sinabi rin ni Del Campo na walang partikular na probisyon sa Joint Circular na namamahala sa confidential funds tungkol sa aliases o mga pirma na ginagamit kaugnay ng mga ito.

Nang tanungin ni Tulfo kung nangangahulugan bang maaaring gamitin ang isang pirma para sa maraming pangalan, sinabi ni Del Campo na ang mahalagang requirement ay mapunta ang pera sa totoong tao.

“Dapat po ito ay mabigay sa totoong tao po. Yan po ang importante sa Joint Circular,” sinabi niya.

Hiwalay namang tinanong ni Senator-judge Francis “Kiko” Pangilinan kung ano ang mangyayari kung hindi lubos na nagamit ang ₱125-milyong confidential fund ng OVP para sa Disyembre 21 hanggang 31, 2022 sa itinakdang panahon.

Sinabi ni Del Campo na dapat ibalik sa National Treasury ang pondong hindi nagamit. Sinabi rin niyang hindi pinapayagan sa Joint Circular ang reimbursement ng mga gastos.

“Ang reimbursement po hindi po ito pinapayagan sa Joint Circular,” sinabi niya.

Nang tanungin ni Pangilinan kung normal sa ibang ahensya ang ganitong paggastos ng confidential funds sa pagtatapos ng taon, sumagot si Del Campo, “Hindi po.”

Tinanong din ni Senator-judge Erwin Tulfo kung naibalik na ang mga halagang sakop ng COA disallowances.

Sinabi ni Del Campo na inaffirm na ng COA Commission Proper ang Notice of Disallowance para sa 2022 transaction ng OVP. Idinagdag niya na may final motion for reconsideration na nakabinbin pa sa Commission Proper.

Sinabi rin ni Del Campo na nakatanggap ang DepEd ng credit notices para sa transactions sa una at ikalawang quarter ng 2023 habang under review and evaluation pa ang third-quarter transactions.

Tinanong naman ni Senator-judge Paolo Benigno “Bam” Aquino IV si Del Campo tungkol sa mga kakaibang pangalan na lumitaw sa acknowledgment receipts.

Sinabi ni Del Campo na ang mga kakaibang pangalan ay hindi kabilang sa mga dahilan na ginamit ng COA sa mga disallowance. Sinabi rin niyang hindi bineripika ng mga auditor ang pagkakakilanlan ng recipients dahil compliance audit ang isinagawa.

Tinanong ni Aquino kung ang bawat acknowledgment receipt ay dapat may katumbas na totoong tao at kung ang aktibidad na nakasaad sa report ay dapat talagang naisagawa.

“Opo, tama po,” sagot ni Del Campo.

Sinabi rin ni Del Campo na wala pang sinisimulang fraud audit ang COA kaugnay ng OVP at DepEd transactions ngunit pinag-aaralan ang posibilidad nito kasama ang COA chairperson.

Samantala, binanggit ni Senator-judge Panfilo “Ping” Lacson ang probisyon ng Joint Memorandum Circular 2015-01 na nagsasabing maaaring siyasatin ng confidential at intelligence-funds auditors ng COA ang classified records na nakatago sa vault ng isang ahensya “if circumstances so demand.”

Tinanong ni Lacson kung dapat bang naging dahilan ang pagkakaroon ng maraming aliases upang siyasatin ang vault at alamin kung may totoong mga tao sa likod ng mga ito.

Hiwalay namang kinuwestiyon ni Senator-judge Imee Marcos si Del Campo tungkol sa impormasyong isinaalang-alang ng COA matapos maisumite ang liquidation documents.

Sinabi ni Del Campo na isinasaalang-alang ng mga auditor ang impormasyong nadiskubre matapos ang pagsusumite kapag itinuturing nilang may kaugnayan ito sa liquidation na kanilang sinusuri.

Sa isa pang palitan, sumang-ayon si Del Campo sa pagtatanong na hindi nakatali ang COA sa pagklasipika ng isang ahensya sa isang aktibidad bilang confidential at kailangan pa ring maayos na ma-liquidate ang confidential-fund expenditures.