KINUMPIRMA ng Commission on Appointments nitong Huwebes ang appointments ni Armed Forces Chief of Staff Gen. Antonio G. Nafarrete at 37 pang matataas na opisyal ng militar sa plenary session sa Senado.

Bago ang botohan, sinabi ni Nafarrete sa komisyon na pananatilihin ng AFP ang presensiya nito sa karagatan ng Pilipinas, palalakasin ang pagbabantay at komunikasyon at sasanayin ang mga tauhan nito na sumunod sa mga batas sa karapatang pantao at armadong labanan.

Pinangunahan ni Senate President Sherwin Gatchalian, ex officio chairman ng CA, ang session.

Inaprubahan ng CA ang ad interim appointments ng mga opisyal. Agad nagkakabisa ang ganitong appointment ngunit kailangan ng pagsang-ayon ng komisyon upang manatiling balido.

Binati ni Gatchalian si Nafarrete at sinabing susuportahan ng Kongreso ang AFP modernization program na naglalaan ng pondo para sa bagong kagamitang militar at pagpapahusay ng kasalukuyang sistema.

Kabilang sa mga kinumpirma sina Lt. Gens. Francis Anthony M. Coronel at Thad Rufino P. Candelario at Maj. Gens. Gieram R. Aragones, Marion T. Angcao, Ronaldo V. Juan at Moises L. Micor.

Kinumpirma rin ng CA sina Rear Adms. Edwin M. Nera at Emilio G. Oria Jr.; Commodores Carlos R. Ruiz III, Ramilo B. Trinidad at Elmer G. Toriado; at Brig. Gens. Jessie R. Montoya, Prudencio A. Iddoba, Victor M. Llapitan, Gilberto T. Esteban Jr., Frederick A. Ancheta at Monotano B. Almodovar.

Ang flag officers ay matataas na opisyal ng Navy na kapantay ng mga heneral sa Army at Air Force.

Sa pagdinig, tinanong ni Sen. Risa Hontiveros si Nafarrete tungkol sa pagtatanggol sa teritoryo, pagbili ng kagamitang militar at mga alegasyon ng paglabag sa karapatang pantao.

Sinabi ni Nafarrete na pananatilihin ng AFP ang presensiya nito sa teritoryal na karagatan ng Pilipinas at sa siyam na bahaging hawak ng bansa sa Kalayaan Island Group.

“As the Chief of Staff of the Armed Forces of the Philippines, it is our mandate to uphold our sovereign rights, our sovereignty, and protect our people,” ani Nafarrete.

Sinabi niyang ipatutupad ng AFP ang archipelagic defense concept, isang estratehiya para ipagtanggol ang mga isla, karagatan at iba pang teritoryo ng bansa.

Ayon kay Nafarrete, kailangang palakasin ng militar ang drones at iba pang kagamitang pinatatakbo nang walang sakay na tao, komunikasyon at sistema ng pag-uutos upang mabantayan ang karagatan at mapag-ugnay ang mga puwersa.

Tinanong din ni Hontiveros ang planong pagbili ng multi-role fighters, mga eroplanong pandigma na maaaring gamitin sa iba’t ibang misyon.

Sinabi ni Nafarrete na kailangan pa niyang kumonsulta sa pinuno ng Philippine Air Force. Pinag-aaralan pa umano ng Air Force ang mga pagpipilian upang matukoy kung aling eroplano ang pinakaangkop sa pangangailangan ng bansa.

“As newly installed Chief of Staff, we still have to confer with my commanding general Philippine Airforce as far as the acquisition of this multi-role fighters, as they’ve been market scoping on what’s the best multi-role fighter we should acquire ma’am,” ani Nafarrete.

Itinanong din ni Hontiveros ang inilabas na writs of amparo at habeas data at temporary restraining order ng Supreme Court para kay human-rights lawyer Rey A. Gorgonio at ilang development workers.

Ang mga writ ay proteksiyon mula sa korte laban sa banta sa buhay, kalayaan o seguridad at sa labag sa batas na pangongolekta o paggamit ng personal na impormasyon.

Inakusahan sa petition ang ilang tauhan ng militar ng red-tagging, pagmamanman, pananakot at pagbabanta. Ang red-tagging ay pag-uugnay sa isang tao o grupo sa mga komunistang rebelde o teroristang organisasyon nang walang sapat na patunay.

Isinama si Nafarrete bilang respondent dahil siya noon ang commanding general ng Philippine Army.

Binanggit din ni Hontiveros ang puna ng human-rights advocates sa isang operasyon noong Abril ng Army’s 79th Infantry Battalion sa Toboso, Negros Occidental, kung saan 19 katao ang nasawi.

Sinabi ni Nafarrete na hindi pa niya natatanggap ang kopya ng court action at kopyang nai-post pa lamang sa social media ang nakita niya.

Ayon kay Nafarrete, itinuturo sa mga opisyal at sundalo ang pagsunod sa human-rights at international humanitarian law. Ito ang mga patakaran sa armadong labanan na nagpoprotekta sa mga taong hindi nakikibahagi sa sagupaan.

“We always adhere to the conventions of the International Human Rights Law,” ani Nafarrete.

Sinabi niyang kailangang naaayon sa batas, maayos na planado at mahigpit na binabantayan ang mga operasyong militar.