MARIING inusisa nina Senador Raffy Tulfo, Erwin Tulfo at Vicente “Tito” Sotto III nitong Lunes si dating Office of the Vice President special disbursing officer Gina Acosta tungkol sa pag-asa nito kay Col. Raymund Dante Lachica sa paghawak at pagdodokumento ng confidential-fund activities.

Naganap ang mga palitan sa ika-17 araw ng impeachment trial ni Bise Presidente Sara Duterte, kung saan tinanong si Acosta tungkol sa acknowledgment receipts, paggamit ng aliases at kanyang pananagutan bilang special disbursing officer.

Tinanong ni Senador-Hukom Raffy Tulfo si Acosta kung paano niya itinuturing ang sarili — “smart, average, or stupid?”

“Nasa average lang po ako kapag tao, Your Honor,” sagot ni Acosta.

Tinukoy ni Raffy Tulfo ang mga pangalang gaya ng “Belat,” “Pagong” at “Pusa” at tinanong kung magugulat ang isang average na tao kapag nakita ang mga ito sa mga rekord na tinalakay sa paglilitis.

“Magugulat po,” sagot ni Acosta.

Tinukoy din niya ang isa pang kopya na ayon sa kanya ay maraming pangalan ng mga impormante ngunit iisa lamang ang pirma.

Sinabi ni Acosta na itinanong niya ito kay Lachica.

“Pina-reply ko po yun, si Col Lachica, Your Honor. At ang sagot naman niya sa akin, Ma’am Gina, those are sensitive information, Ma’am Gina. At saka, confidential in nature po yun,” ani Acosta.

Nang tanungin kung basta na lamang niyang pinaniwalaan si Lachica, sinabi ni Acosta na ito ang inatasang magpatupad ng confidential activities sa ground.

“Kasi siya po ang nag-implement sa mga confidential activities, Your Honor, on the grounds. Siya po ang inatasan na mag-implement. Siya po ang implementor po, Your Honor,” ani Acosta.

Pagkatapos nito ay sinabi ni Raffy Tulfo kay Acosta: “So for me, in this case, you’re stupid in the name of blind loyalty.”

Sumagot si Acosta: “Hindi ko maintindihan, Your Honor. I’m sorry.”

Hiwalay namang inusisa ni Senador-Hukom Erwin Tulfo si Acosta tungkol sa mga pangalang kabilang ang Mary Grace Piattos, Chippy McDonald, Pusa, Pagong, Ngitngit at Belat.

Nang tanungin ni Erwin Tulfo kung may narinig siyang tunay na apelyidong Pusa o Pagong sa Davao, sumagot si Acosta: “Wala po akong narinig na ganyan, Your Honor.”

Gayunman, nanindigan si Acosta na totoong tao ang mga recipient.

“Totoong tao po sila,” ani Acosta.

Tinanong ni Erwin Tulfo: “Totoong [tao], pero hindi totoong pangalan?”

“Yes po, Your Honor,” sagot ni Acosta.

Inusisa rin niya kung bakit walang rekord ng tunay na pangalan ng mga recipient at kung bakit ibinigay ni Acosta ang pondo kay Lachica kahit alam nitong wala itong fidelity bond.

“Pero alam niyo na wala po siya fidelity bond. And yet, dahil utos po ni VP, dinisburse po sa kanya. Tama po?” tanong ni Erwin Tulfo.

“Yes, Your Honor,” sagot ni Acosta.

Sinabi ni Acosta na itinalaga ni Duterte si Lachica bilang security officer.

Nang tanungin kung sa tingin niya ay may mali sa paggastos ni Lachica ng confidential fund, sinabi ni Acosta na binigyan siya ng fund utilization report at inihambing niya ito sa nakatalang objects of expenditure.

“Sa tingin ko po, wala kasi nabigyan po niya na ako ng fund utilization report, Your Honor, na binabangga ko po sa object of expenditures na binigay niya sa akin. Nag-tugma po ang mga amount, Your Honor,” ani Acosta.

Tinanong din ni Erwin Tulfo ang mga gastos na may kaugnayan sa tree planting, mga mesa at upuan.

Sinabi ni Acosta na ang confidential na bahagi ng tree-planting activity ay may kaugnayan sa pag-inspeksiyon o pag-survey sa lugar kung saan gaganapin ang aktibidad.

“So pag-survey po, yun po papasok po ang confidential operation, Your Honor,” ani Acosta.

Nang tanungin naman tungkol sa mga mesa at upuan, sinabi niya: “Gagamitin po yun sa operation, Your Honor.”

Tinanong naman ni Sotto kung paano naisagawa ang confidential-fund activities sa 132 lugar sa loob lamang ng 11 araw.

Nang muling magsimulang magpaliwanag si Acosta tungkol sa papel ni Lachica sa pagpapatupad ng mga aktibidad, sumabat si Sotto: “Ayoko na marinig yung template.”

Umikot ang pagtatanong ng mga senador sa paulit-ulit na testimonya ni Acosta na umasa siya kay Lachica dahil ito ang nagpapatupad ng confidential activities sa ground.

Ang mga naging palitan ay hindi katumbas ng finding ng impeachment court na may iregularidad sa mga kinuwestiyong pangalan, pirma o paggastos.

Patuloy na dinidinig ng impeachment court ang Article I ng reklamo na may kaugnayan sa mga alegasyon sa paghawak at liquidation ng confidential funds.