MULA sa pagiging kulelat sa Reading noong 2018, naitala ng Pilipinas ang pinakamataas nitong PISA scores noong 2025 at kinilala sa OECD 10-year trend analysis bilang fastest-improving sa Reading, ayon kay Sen. Joel Villanueva.

Kasabay nito, sinabi ni Villanueva na maaaring umabot sa humigit-kumulang US$14 trillion ang long-term economic payoff kung lahat ng 15-year-old learners sa bansa ay makarating sa minimum proficiency level o PISA Level 2.

Sa privilege speech sa Senado, sinabi ng senador na tumaas ang scores ng Pilipinas sa Science, Math at Reading sa 2025 Programme for International Student Assessment o PISA.

Batay sa PISA results, umabot sa 367 ang Reading score ng Pilipinas, 371 sa Math at 373 sa Science—ang pinakamataas na naitala ng bansa mula nang sumali sa assessment noong 2018.

Kumpara noong 2022, tumaas ng 20 points ang Reading, 16 points ang Math at 17 points ang Science.

“In 2018, when we first joined PISA, we hit rock bottom. We ranked dead last in Reading and second to last in Math and Science,” sabi ni Villanueva.

Mas dumami rin ang mga estudyanteng umabot sa baseline proficiency. Sa Science, umakyat ang bahagi ng learners mula 23 porsiyento tungong 32 porsiyento; sa Math, mula 16 porsiyento tungong 21 porsiyento; at sa Reading, mula 24 porsiyento tungong 31 porsiyento.

Pero malaki pa ang hahabulin ng bansa.

Sa OECD average, 74 porsiyento ng students ang umaabot sa baseline proficiency sa Science, 65 porsiyento sa Math at 69 porsiyento sa Reading—kumpara sa 32 porsiyento, 21 porsiyento at 31 porsiyento sa Pilipinas.

Pinuri rin ni Senate President Sherwin Gatchalian ang gains ngunit sinabing hindi pa tapos ang trabaho sa education sector.

“Let us take pride in this achievement. It is truly encouraging to see that our collective efforts are bearing fruit, as reflected in the latest PISA results,” sabi ni Gatchalian.

Ayon kay Gatchalian, ipinapakita ng gains na “our reforms and learning recovery initiatives are making a difference,” ngunit agad niyang idinagdag: “But the job is not yet done.”

Sinabi niyang kailangang ipagpatuloy ang learning recovery at iba pang education reforms, kabilang ang pagpapalakas sa early childhood development at teacher education sa pagtalakay ng 2027 national budget.

“Sa pagtalakay natin sa 2027 national budget, patuloy nating bibigyang-prayoridad ang mga repormang magpapatatag sa pundasyon ng ating mga mag-aaral, mula early childhood development hanggang teacher education, upang mas marami pa tayong makitang learning gains sa mga susunod na PISA results,” sabi ni Gatchalian.

Ayon naman kay Villanueva, ang 2025 reading improvement ay inilarawan bilang katumbas ng humigit-kumulang dalawang taong learning progress kumpara sa 2022 cohort.

“Kumpara noong 2022, ang mga Pinoy learner na may edad 15 taong gulang ay dalawang taong mas ‘advanced’ sa mga kaedad nilang Pilipino tatlong taon na ang nakararaan,” aniya.

Sinabi rin ni OECD Director for Education and Skills Andreas Schleicher na hindi lamang “statistical noise” ang improvement, bagaman mahaba pa ang kailangang tahakin ng Philippine education system.

Ayon kay Villanueva, sinabi ni Schleicher na tinataya ng mga researcher sa Stanford University na kung bawat 15-year-old sa Pilipinas ay makarating sa PISA Level 2, maaari itong magdagdag ng humigit-kumulang US$14 trillion sa ekonomiya sa buong working life ng mga estudyanteng iyon.

Ang US$14-trillion figure ay isang long-term economic projection at hindi agarang dagdag sa ekonomiya o kasalukuyang halaga ng GDP.

“The latest PISA results should give us hope, but they should also give us urgency,” sabi ni Villanueva.