ITINUTULAK ni Senador Juan Miguel “Migz” Zubiri ang mas malawak na regional competition para sa arnis habang nagpaplano ang Philippine Eskrima Kali Arnis Federation na bumuo ng Asian federation, magsagawa ng Asian championship at ipagpatuloy ang kampanya para maisama ang sport sa Southeast Asian Games.

Kasabay nito, 358 atleta ang lumalahok sa PEKAF National Battle of Champions sa Rizal Memorial Coliseum sa Maynila, kung saan maaaring mapili ang mga nangungunang manlalaro para sa Philippine National Arnis Team training pool.

Sinabi ni Zubiri, na PEKAF president at national chairperson, na plano ng federasyon na bumuo ng Asian Arnis Federation, magsagawa ng Asian Arnis Championship at ipagpatuloy ang pagsusulong sa arnis para sa SEA Games.

“Our dream is bigger than just one tournament. Gusto nating dumating ang panahon na regular nang nilalaro ang arnis sa SEA Games, may Asian championships tayo, at may Filipino athletes na recognized across the region as the standard in the sport that came from our own country,” sinabi ni Zubiri.

Ang biennial National Battle of Champions, na idinaraos mula Agosto 7 hanggang 9, ay nilalahukan ng mga gold at silver medalist mula sa qualifying tournaments sa Luzon at National Capital Region, Visayas at Mindanao.

May 92 gold medals na nakataya sa Seniors at Juniors divisions.

“Hindi lang basta 358 athletes ang nandito ngayon. These are champions from Luzon, Visayas and Mindanao who fought their way here, and some of them may become the next members of our Philippine National Arnis Team,” sinabi ni Zubiri.

Sa katatapos na 18th World Eskrima Kali Arnis Federation World Championship sa New Delhi, India, nakapag-uwi ang Philippine contingent na binubuo ng walong atleta at tatlong coaches ng 19 gold, apat na silver at isang bronze medal, ayon sa PEKAF.

Nag-anunsyo si Philippine Sports Commission Chairman John Patrick “Pato” Gregorio ng cash incentives para sa mga miyembro ng Philippine National Arnis Team na lumahok sa world championship.

Nagpahayag din si Gregorio ng suporta sa pagdadala ng arnis sa mas marami pang international sporting events, kabilang ang SEA Games. Inihayag din niya ang planong Southeast Asian Sports Tourism Summit kasabay ng ASEAN activities sa Pilipinas sa Nobyembre.

Sinabi naman ni Education Secretary Juan Edgardo “Sonny” Angara, na guest speaker sa pagbubukas, na magsisikap siyang maisama ang arnis sa mga sports na inaalok ng scholarships sa National Academy of Sports sa New Clark City sa Capas, Tarlac.

Sinabi rin ni Angara na susuportahan niya ang mas maraming arnis events sa susunod na Palarong Pambansa.