GENERAL TINIO, Nueva Ecija – Natagpuan ang bangkay ng isang lalaki sa loob ng isang abandonadong Sports Utility Vehicle (SUV) dito nitong Miyerkules ng hapon.

Duguan umano ang nasabing biktima na hanggang sa kasalukuyan ay inaalam pa ang pagkakakilanlan, ayon sa pulisya.

Ang nasabing SUV, na isang Ford Titanium Everest ayon kay police chief Major Shariel C. Paulino, ay napansin na ng mga residente na nakaparada sa Bgy. Pias nitong Lunes.

Sa video sa Facebook post ni Angelyn Alfonso Reyes, makikita na maraming residente ang nakamasid sa gilid ng kalsada nuong gabi habang nakapaikot ang kapulisan sa SUV nang ito ay buksan upang siyasatin ang loob nito.