BAGAMA’T hindi pa pormal na naluluklok bilang susunod na House Speaker ng 19th Congress si House Majority Leader at Leyte 1st Dist. Rep. Martin G. Romualdez ngayon pa lamang ay binabati na siya ni Quezon City Rep. Anthony Peter “Onyx” D. Crisologo.

Nagpasalamat din si Crisologo kay Romualdez dahil sa pagtitiwalang ibinigay nito sa kaniya matapos siyang manungkulan bilang dating House Assistant Majority Leader ng kasalukuyang 18th Congress at bilang Chairman ng Lakas-Christian Muslim Democrats (Lakas-CMD) sa National Capitol Region (NCR).

“I am proud to have worked alongside you in the 18th Congress as one of your Active Assistant Majority Leaders in the Rules Committee. With your Leadership and Devotion to the Filipino People, our incoming administrations legislative agenda in Congress is in good hands,” sabi ni Crisologo patungkol kay Romualdez.

Naniniwala ang kongresista na maganda ang kinabukasang naghihintay sa Kamara de Representantes sa ilalim ng pamumuno ni Romualdez bilang susunod na House Speaker. Nakita aniya ang mahusay na “leadership” ni Romualdez bilang Majority Leader.

Bagama’t hindi naging maganda ang resulta ng nagdaang halalan para kay Crisologo, walang dahilan upang hindi nito gampanan ang kaniyang tungkulin bilang kongresista matapos itong dumalo sa session ng Kongreso.

Hindi naman makikitaan ng kalungkutan o pagka-dismaya ang mambabatas sa kabila ng malungkot na resulta ng eleksiyon para sa kaniya dahil mababanaag parin dito ang pagiging isang maginoo t walang kinikimkim na galit sa kaniyang dibdib.