SINIBAK ni Department of the Interior and Local Government Secretary Jonvic Remulla noong Martes ang ilang opisyal ng Makati City Fire Station matapos matuklasang ang kanilang mga sasakyan ay nakaharang sa fire truck bay— na paglabag sa Fire Code at sa mga alituntunin nito.

Sa isang biglaang inspeksyon, nakita ni Remulla ang mga sasakyang nakaparada na humaharang sa pasukan at labasan ng mga fire truck at ambulansya.

Ayon sa kanya, ang ganitong uri ng sagabal ay maaaring magdulot ng matinding pagkaantala sa pagtugon sa sunog at iba pang emerhensiya kung saan buhay at ari-arian ang nakataya.

Batay sa Republic Act 9514 o Fire Code of the Philippines of 2018 at sa 2019 Revised Implementing Rules and Regulations (IRR), mahigpit na ipinagbabawal ang anumang harang sa daanan ng mga sasakyang pang-emerhensiya, gayundin ang anumang hadlang o panghihimasok sa operasyon ng fire service.

Ang mga opisyal na mapapatunayang lumabag ay maaaring managot sa ilalim ng Section 11 ng Fire Code para sa sinadyang kapabayaan o matinding kakulangan sa pagtupad ng kanilang tungkulin.

Nanawagan ang DILG sa lahat ng hepe ng fire station na ipagbawal ang pagparada sa harap o malapit sa mga fire truck at agad na ipatanggal ang lahat ng hindi awtorisadong sasakyan na nakaharang.