HINIMOK ni Deputy Speaker at Zambales Rep. Jefferson “Jay” Khonghun nitong Huwebes ang mahinahong pagtingin sa usapin tungkol sa kandidatura ni Justice Secretary Jesus Crispin “Boying” Remulla bilang susunod na Ombudsman.

Aniya, ang desisyon ay dapat nakabatay sa kwalipikasyon at ebidensya, hindi sa ingay at hinala.

“Dapat nating hayaan ang proseso na magpatuloy. Bigyan sana natin ng pagkakataon ang lahat ng kandidato, kabilang si Sec. Remulla, na ipakita ang kanilang kwalipikasyon at talaan ng serbisyo.

Huwag sana tayong padadala sa tsismis o alegasyon na walang matibay na basehan,” pahayag ni Khonghun.

Ipinaliwanag ni Khonghun na ang Judicial and Bar Council (JBC) ang may mandato na maingat na suriin ang mga kandidato para sa mga posisyon sa hudikatura at quasi-hudikatura, na kung saan ang proseso ay sadyang nilikha para mapili ang mga aplikante na may mataas na pamantayan.

“Trabaho ng JBC na timbangin ang lahat: karanasan, integridad at serbisyo. Kung may reklamo, dapat itong siyasatin. Ngunit hindi ibig sabihin na awtomatikong guilty ang isang tao dahil may nag-file ng kaso,” dagdag pa niya, na nagsabing hindi dapat gamitin ang simpleng pagkakaroon ng reklamo para ma-disqualify agad ang isang kandidato.

Nagbabala rin ang Deputy Speaker laban sa paggamit ng pulitika bilang salik sa resulta ng seleksyon, dahil aniya, makasisira ito sa tiwala ng publiko sa mga demokratikong institusyon.

“Kung pulitika ang paiiralin, mahihirapan tayong maniwala sa magiging resulta. Ang kailangan ng bayan ay isang Ombudsman na may kredibilidad at tunay na independyente,” diin niya.

Napansin ni Khonghun na ang karamihan sa mga kritisismo kay Remulla ay lumalakas online, kung saan madalas na ang mga kwento ay hinuhubog ng pulitikang interes kaysa sa mga beripikadong katotohanan.

Nanawagan siya ng mahinahong diskusyon at paggalang sa tamang proseso.

“Minsan kasi may tendensiyang gamitin ang social media para sirain ang isang tao kahit wala pang pinal na desisyon. Hindi natin dapat hayaan na ang trial by publicity ang pumalit sa rule of law,” wika niya.

Ang oposisyon kay Remulla ay nakatuon sa mga kasong nakabinbin sa Office of the Ombudsman at iba pang ahensya, kung saan pinagdududahan ang kanyang kakayahan para sa posisyon.

Ngunit muling nilinaw ni Khonghun na ang pagiging patas ay nangangahulugang hiwalay na tingnan ang mga paratang at ang pinal na hatol.

“Wala naman tayong naririnig na kaso na nag-prosper laban kay Sec. Remulla. Kung ang pag-file lang ng kaso ang dahilan para madisqualify, maaabuso ang sistema ng hustisya dahil puwede kang kasuhan kahit walang basehan at hindi ka na magiging Ombudsman,” paliwanag ng mambabatas mula sa Zambales.

Pinaalalahanan niya ang publiko na kahit ang mga dedikadong lingkod-bayan ay nakararanas ng mga paratang o reklamo, ngunit dapat itong husgahan base sa katotohanan at hindi sa tamang timing ng politika.

“Nabanggit na ni Sec. Remulla na susunod siya sa lahat ng kinakailangan. Ang hinihiling ko lang: bigyan natin siya ng patas na pagtingin na gusto rin nating matanggap para sa ating sarili. Hanggang walang pinal na desisyon, karapat-dapat siyang tratuhin nang may respeto,” dagdag ni Khonghun.

Binigyang-diin ng mambabatas na ang mas malawak na isyu ay hindi lang tungkol sa isang kandidato, kundi sa pagpapanatili ng kredibilidad ng proseso sa pagpili ng nangungunang tagapangasiwa laban sa katiwalian sa bansa, na dapat ay malaya sa labis na impluwensiya ng politika at nakabase sa respeto sa batas.

“Kailangan nating ipakita sa mga Pilipino na kaya nating tumayo sa ibabaw ng politika at magbigay ng isang Ombudsman na tunay na may kakayahang panagutin ang mga makapangyarihan. Iyon lang ang paraan para maging matatag ang ating mga institusyon,” pagtatapos ni Khonghun.