MULING pinagtibay ng Kamara de Representantes ang paninindigan nito para sa katotohanan, pananagutan at tungkulin sa ilalim ng Konstitusyon kasunod ng desisyon ng Korte Suprema na ideklarang unconstitutional ang Articles of Impeachment na inihain laban kay Vice President Sara Duterte.

Ayon sa tagapagsalita ng Kamara na si Atty. Princess Abante, hindi pa opisyal na natatanggap ng Mababang Kapulungan ng Kongreso ang kopya ng desisyon, ngunit tiniyak niyang ito ay irerespeto ng Kapulungan kapag kanilang natanggap.

“We respect the Supreme Court. But our constitutional duty to uphold truth and accountability does not end here,” ani Abante.

“Ang desisyon ng Korte Suprema ay igagalang—ngunit kailanman ay hindi ito magiging dahilan upang kami’y tumigil sa pagtupad ng aming tungkulin,” dagdag pa niya.

Binigyang-diin ni Abante na ang kapangyarihan na simulan ang proseso ng impeachment ay nakatalaga lamang sa Mababang Kapulungan, alinsunod sa itinatadhana ng Konstitusyon.

“The impeachment process is not just a legal mechanism—it is a vital democratic safeguard. Under Article XI, Section 3 of the Constitution, the exclusive power to initiate impeachment rests solely with the House of Representatives. This was firmly established in Francisco v. House of Representatives (2003) and has long stood as settled doctrine,” aniya.

Nagbabala siya na ang pakikialam ng hudikatura sa yugtong ito ay maaaring magpahina sa prinsipyo ng checks and balances at banta sa karapatan ng publiko na maningil ng pananagutan mula sa matataas na opisyal ng pamahalaan.

“To allow judicial interference in the initiation of this process risks undermining the very principle of checks and balances. Impeachment is a political act rooted in the people’s will—no legal technicality should silence it,” aniya.

“This is not about one person. Hindi lang ito laban sa isang opisyal. Ito ay laban para sa karapatan ng taumbayan na maningil ng pananagutan sa gobyerno,” dagdag pa niya.

Nilinaw ni Abante na ang naging tugon ng Mababang Kapulungan ay hindi pagsuway kundi isang matatag at makatarungang pagtatanggol ng kanilang konstitusyunal na tungkulin.

“The House will exhaust all remedies to protect the independence of Congress and preserve the sanctity of our constitutional role. This is not defiance. This is constitutional fidelity,” aniya.

“We owe it to the people to be relentless in our duty—because accountability should never be optional, no matter how high the office,” pagtatapos ni Abante.

Sa en banc na desisyon, sinabi ng SC na ang reklamo sa impeachment ay bawal sa ilalim ng isang-taong panuntunan ng 1987 Konstitusyon.

Bunga nito, hindi maaaring magkaroon ng hurisdiksyon ang Senado sa reklamo at hindi maaaring ituloy ang impeachment trial.

Gayunman, nilinaw ni SC Spokesperson Camille Ting na hindi ipinagbabawal ng desisyon ang paghahain ng panibagong impeachment case kay Duterte simula Pebrero 6, 2026.