BUSAN, South Korea – Ipinahayag ni Pangulong Ferdinand R. Marcos Jr. ang kanyang kumpiyansa na makagagawa ang pamahalaan ng isang “maayos at malinis na badyet” para sa taong 2026 habang ipinagpapatuloy ng Kongreso ang pagtalakay sa panukalang pambansang paggasta.

Sa panayam ng mga mamamahayag matapos ang Asia-Pacific Economic Cooperation (APEC) Summit noong Sabado, sinabi ni Marcos na parehong kapulungan ng Kongreso — ang Senado at ang

Mababang Kapulungan — ay nakakita ng mga posibleng matitipid sa ilang proyekto ng gobyerno, partikular sa mga imprastruktura, kasunod ng kanyang direktiba na bawasan ang gastos sa konstruksyon.

“Sa ngayon, sa pagpapatuloy ng budget hearings, marami nang nakita sa dalawang Kapulungan, sa House of Representatives at sa Senado, na magkakaroon pa tayo ng mga savings,” aniya.
“Sa tingin ko, maipapakita natin na posible talagang gumawa ng isang maayos at malinis na badyet.”

Nauna nang inanunsyo ng Pangulo na nagkasundo ang Senado at ang Mababang Kapulungan na i-livestream ang gaganaping bicameral conference committee deliberations para sa 2026 national budget — isang unang pagkakataon sa kasaysayan ng lehislatura ng Pilipinas — upang maiwasan ang mga huling-minutong insertions at lihim na kasunduan na madalas maging sanhi ng kontrobersya.

Iniutos din ni Marcos sa Department of Public Works and Highways (DPWH) na bawasan ng hanggang 50 porsyento ang halaga ng mga materyales sa konstruksyon, na inaasahang makakatipid sa gobyerno ng humigit-kumulang PHP30 bilyon hanggang PHP45 bilyon.

Ayon sa kanya, ang matitipid na halaga ay ilalaan sa mga pangunahing sektor gaya ng kalusugan, edukasyon, at seguridad sa pagkain.

Binigyang-diin din ng Pangulo ang kahalagahan ng mga repormang sistematiko upang mapigilan ang red tape at korapsyon sa paggamit ng pondo ng bayan.

“Kahit anong gawin mo, maghahanap ng paraan ‘yan para lokohin ang gobyerno. Pero kung maayos ang sistema, mas mahihirapan silang mangurakot,” paliwanag ni Marcos.

“Kapag mas mahirap gawin, mas kokonti na lang ang mga taong gumagawa ng katiwalian. Kaya tuloy-tuloy ang laban na ito — hindi ito nasosolusyunan sa isang iglap.” PNA