INARESTO ng mga pulis ang isang lalaki dahil sa pagmumura at panunutok ng baril sa kapitbahay niyang delivery rider noong Lunes sa Valenzuela City.

Palabas ng bahay niya sa Disiplina Village, Brgy. Bignay ang 31-anyos na biktima nang salubungin ng galit na galit na kapitbahay dakong alas-9:50 ng gabi at pinagmumura habang iwinawasiwas ang hawak na baril.

Sasagot pa lang ang biktima nang tutukan ng baril ng suspek kaya nagtatakbo para humingi ng saklolo sa mga pulis.

Naaresto ang nagmura at nanutok ng cal .38 na baril kargado ng apat na bala.

Sasampahan siya ng kasong grave threat at paglabag sa Comprehensive Firearms and Ammunition Regulation Act, ayon sa mga pulis.